الماتىدا «ءومىر ەرتە باستالادى: شالا تۋعان بالالارعا كومەكتەسۋدەگى ۇلتتىق باسىمدىقتار» تاقىرىبىندا حالىقارالىق ءعىلىمي-بىلىم بەرۋ كونفەرەنسياسى باستالدى.
القالى جيىن – تاجىريبە الماسۋ، جەتىستىكتەردى تالقىلاۋ، جاڭا ماقساتتاردى بەلگىلەۋ جانە ەڭ باستىسى جارىق دۇنيەگە ءقازىر عانا كەلگەن، ءبىراق سالماعى از، جەتىلە قويماعان بوبەكتەردىڭ اماندىعى ءۇشىن كۇش بىرىكتىرۋ مۇمكىندىگى.
كونفەرەنسيا سپيكەرلەرى نەوناتولوگيانىڭ وتكىر ماسەلەلەرىن، ماسەلەن، «شالا تۋعان نارەستەلەردەگى سۋرفاكتانتتى تەراپيا»، «پەرزەنتحاناداعى العاشقى رەانيماسيا جانە تۇراقتاندىرۋ»، «نەوناتالدى سەپسيس» تاقىرىپتارىن، قازاقستان بويىنشا ەڭ العاش بولىپ ءبىزدىڭ الماتىدا اشىلعان، شالا تۋعان سابيلەردىڭ وسىپ-جەتىلۋىنە كوپ كومەگى ءتيىپ جاتقان «ءسۇت بانكىنىڭ» ارتىقشىلىعىن تالقىلاۋدا. ارينە، جارىق دۇنيە ەسىگىن اشاتىن بارلىق نارەستەنىڭ تەك اناسىنىڭ ومىراۋ سۇتىمەن قورەكتەنۋى ماڭىزدى ەكەنى دە ايتىلۋدا.
«ءبىز بۇل كونفەرەنسيامىزدى 17 قاراشادا اتالىپ وتكەن حالىقارالىق شالا تۋعان نارەستەلەر كۇنىنە ارنايمىز. ءبىزدىڭ ماماندار مىقتى ءارى جۇرەكتى، مەيىرىمدى! 500 گرامم بولىپ تۋعان بوبەكتەردى دە ادام قاتارىنا قوسىپ جاتىر. بۇگىنگى كۇنى بىلىكتى دارىگەرلەردىڭ كۇش-جىگەرىنىڭ، كۇتىم جاساۋداعى زاماناۋي تەحنولوگيالاردىڭ جانە مەملەكەت قولداۋىنىڭ ارقاسىندا ەلىمىزدە مىڭداعان بالا سالاۋاتتى جانە تولىققاندى ءومىر سۇرۋگە مۇمكىندىك الۋدا. ءبىز قازاقستاننىڭ ددسۇ مەن يۋنيسەف-تىڭ حالىقارالىق ستاندارتتارىن بەلسەندى تۇردە ەنگىزىپ، پەريناتالدىق جەلىنى نىعايتىپ، شالا تۋعان نارەستەلەرگە كۇتىم جاساۋدا ءپانارالىق ءتاسىلدى دامىتىپ وتىرعانىن ماقتان تۇتامىز»، – دەدى كونفەرەنسيا ۇيىمداستىرۋشىسى پروفەسسور قارلىعاش جۇبانىشيەۆا.
كونفەرەنسيانىڭ ەكىنشى كۇنى ەرتەڭ الماتىداعى پەريناتولوگيا جانە بالالار كارديوحيرۋرگياسى ورتالىعىندا «شەبەرلىك ساباقتارىمەن» جالعاسادى.