2025 جىلى الماتى دۇنيەجۇزىلىك تۋريستىك اليانسقا (World Tourism Alliance، WTA) – ءتۋريزمنىڭ تۇراقتى دامۋىن قولداۋعا باعىتتالعان 41 ەلدەن 251 مۇشەنى بىرىكتىرەتىن حالىقارالىق ۇكىمەتتىك ەمەس ۇيىمعا تولىققاندى مۇشە بولدى.
بۇل مۇشەلىك قالانىڭ تالدامالىق دەرەككە، ءبىلىم بەرۋ رەسۋرسىنا جانە حالىقارالىق ارىپتەستىككە قول جەتكىزۋىنە مۇمكىندىك بەرەدى، - دەپ حابارلايدى aqshamnews.kz.
WTA مەملەكەتتىك قۇرىلىمدار مەن بيزنەس وكىلدەرىن جانە ساراپشىلار قاۋىمداستىعىن بىرىكتىرەدى. ۇيىم حالىقارالىق ءتۋريزمدى دامىتۋعا ىقپال ەتەدى، زەرتتەۋلەر جۇرگىزەدى، كەڭەس بەرەدى جانە مامان دايارلاۋ ىسىمەن اينالىسادى، سونداي-اق مەملەكەتتىك جانە جەكە سەكتور اراسىنداعى كووپەراسيانى نىعايتادى.
ءقازىر حانچجوۋدا (قحر) WTA سيانحۋ 2025 جىل سايىنعى ءىس-شاراسى ءوتىپ جاتىر. ونىڭ اياسىندا الماتىعا اليانس قۇرامىنا قابىلدانعانىن راستايتىن سەرتيفيكات رەسمي تۇردە تابىستالدى.
2025 جىلعى ديالوگتىڭ تاقىرىبى - «شەكارادان تىس: ءتۋريزمنىڭ شەكسىز كوكجيەگىنە ۇمتىلىس». تالقىلاۋلاردىڭ نەگىزگى باعىتتارى: تۇراقتى دامۋ، سالالار اراسىنداعى ىقپالداستىق، يننوۆاسيا مەن تۋريزم سالاسىنداعى تەحنولوگيالىق شەشىمدەر.
WTA قۇرامىنا قابىلدانۋ الماتىنىڭ حالىقارالىق سەرىكتەستىگىن كۇشەيتىپ، جاھاندىق ساراپتامالىق ورتاعا جول اشادى جانە قالانىڭ تۋريستىك الەۋەتىن ىلگەرىلەتۋگە جاڭا مۇمكىندىكتەر تۋعىزادى.