جىل باسىنان بەرى 6 796 ءسابي دۇنيەگە كەلدى
اتىراۋدا جىل باسىنان بەرى وبلىستىق پەريناتالدىق ورتالىعىندا 6 796 ءسابي ومىرگە كەلگەن. ونىڭ ىشىندە 96 ەگىز، ءبىر ۇشەم بار، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتىراۋ وبلىستىق پەريناتالدىق ورتالىعى ديرەكتورىنىڭ ورىنباسارى الميرا سابىرعالييەۆانىڭ مالىمەتىنشە، وتكەن جىلمەن سالىستارعاندا ەگىزدەر سانى 9،1 پايىزعا ارتقان.
«بىلتىر وبلىستىق پەريناتالدىق ورتالىقتا 7 375 نارەستە جارىق دۇنيە ەسىگىن اشقان ەدى. ال، بيىلعى جىل باسىنان بەرى 6 796 ءسابي دۇنيەگە كەلدى. ونىڭ ىشىندە ەگىزدەردىڭ سانى ارتا ءتۇستى. ءبىزدىڭ ورتالىقتىڭ دارىگەرلەرى مەن كىشى بۋىن قىزمەتكەرلەرى بيىلعى 9 ايدا 96 ەگىز بەن ءبىر ۇشەمنىڭ ومىرگە امان-ەسەن كەلۋىنە مەديسينالىق كومەگىن بەردى. جىل سوڭىنا دەيىن تۋۋ كورسەتكىشى تاعى وسەدى دەگەن ۇمىتتەمىز»، -دەيدى الميرا سابىرعالييەۆا.
ونىڭ ايتۋىنشا، 19 قاڭتاردا 52 جاستاعى ايەل «اڭساعان ءسابي» جوباسىمەن تۇڭعىش ءسابيىن بوسانعان.
«بۇل جاستا ومىرگە ءسابي اكەلۋ وڭاي ەمەس. ءبىزدىڭ پاسيەنت كوپ جىل ەمدەلگەن. كەيىن «اڭساعان ءسابي» جوباسىمەن بولىنگەن كۆوتاعا سايكەس، ەكۇ ارقىلى بالا كوتەرگەن. وعان 19 قاڭتاردا وتا جاسالدى. ومىرگە سالماعى 3 كەلى 70 گرام، بويى 51 سم ءسابي كەلدى»، -دەيدى الميرا سابىرعالييەۆا.
ال، 6 قىركۇيەكتە ۇشەم دۇنيەگە كەلگەن. ەكەۋىنىڭ سالماعى – 1 كەلى 800 گرامم، ءۇشىنشىسى – 2 كەلى 200 گرامم. جاس وتباسى ەسەت قۇمار مەن ايانگۇل ءسابيتوۆا جاڭا تۋعان ۇشەمگە احماد، باتىرحان، يسمايل ەسىمىن بەرگەن.
ەسكە سالا كەتەلىك، بۇعان دەيىن ەگىزدەر شەرۋىنە اتىراۋ وبلىسىندا 99 بالا قاتىسقانىن جازعان بولاتىنبىز.