الماتى – مۋزەي قىزمەتكەرلەرىن الەمنىڭ جەتەكشى مادەني ورتالىقتارىنا وقۋعا جىبەرىپ، تاعىلىمدامادان وتۋگە جانە شەتەلدە كورمەلەر ۇيىمداستىرۋعا مۇمكىندىك جاسايتىن قازاقستانداعى جالعىز قالا.
الماتى اكىمدىگىنىڭ قولداۋىمەن مۇراجاي سالاسىنىڭ قىزمەتكەرلەرى فرانسيادا (پاريج، لۋۆر)، وڭتۇستىك كورەيادا (سەۋل)، سينگاپۋردا، تۇركيادا (ستامبۋل)، يتاليادا (نەاپول)، اۋستريادا (ۆەنا)، ءازىربايجاندا (باكۋ)، چەحيادا (پراگا) جانە باسقا ەلدەردە وزدەرىنىڭ كاسىبي داعدىلارىن جەتىلدىردى. بۇل الماتىلىق مۋزەيتانۋشىلارعا الەمدىك وزىق تاجىريبەلەردى قابىلداۋعا جانە ولاردى مادەني مۇرانى ساقتاۋ مەن دارىپتەۋ ءۇشىن قولدانۋعا مۇمكىندىك بەرەدى.
الماتى اكىمدىگى مۇراجاي قىزمەتكەرلەرىنىڭ ەڭبەك جاعدايلارىن جاقسارتۋعا دا كوپ كوڭىل بولەدى. 2023 جىلى قالا اكىمىنىڭ باستاماسىمەن مۇراجاي قىزمەتكەرلەرىنىڭ اي سايىنعى ەڭبەكاقىسى جەرگىلىكتى بيۋدجەت ەسەبىنەن 30%-عا ۇلعايتىلدى. بۇدان باسقا، قىزمەتكەرلەردىڭ جالاقىسى جىل سايىن رەسپۋبليكالىق بيۋدجەت ەسەبىنەن 18%-عا ارتۋدا. سونداي-اق، سالاداعى 30 جاس قىزمەتكەر «الماتى جاستارى» قالالىق باعدارلاماسى اياسىندا ءۇي الىپ، قونىس تويىن اتاپ ءوتتى.
سوڭعى ەكى جىلدا الماتى مۇراجايلارى بىرلەستىگى وڭتۇستىك كورەيا، تۇركيا، يتاليا، اۋستريا، چەحيا، ۆەنگريا جانە سەربيادا 9 حالىقارالىق كورمە ۇيىمداستىردى. بۇل جوبالار قازاقستاندىق مادەني مۇرانى شەتەلدە تانىمال ەتۋگە ىقپال ەتەدى جانە الەمدىك مادەني قوعامداستىقپەن بايلانىستى نىعايتادى.
جەرگىلىكتى دەڭگەيدە مۇراجايلاردىڭ قىزمەتى دە بەلسەندى دامىپ كەلەدى: 2024 جىلى 83 كورمە جانە ءارتۇرلى فورماتتاعى 257 ءىس-شارا، سونىڭ ىشىندە سەمينارلار، شەبەرلىك سىنىپتارى جانە مادەنيەت قايراتكەرلەرىمەن كەزدەسۋلەر ءوتتى.
الماتى مۇراجايلارى بىرلەستىگى كوللەكسيالاردى ساقتاۋ جانە تولىقتىرۋ بويىنشا بەلسەندى جۇمىسىن جالعاستىرۋدا. قازىرگى ۋاقىتتا قوردا 66 220 ەكسپونات بار، ونىڭ 94%-ى سيفرلاندىرىلعان. 2024 جىلى كوللەكسياعا تاعى 427 ەرەكشە ەكسپونات قوسىلدى. سيفرلاندىرۋ ارتەفاكتىلەردى ۇزاق مەرزىمدى ساقتاۋعا جانە ولاردىڭ زەرتتەۋشىلەر مەن كەلۋشىلەرگە قولجەتىمدىلىگىن ارتتىرۋعا ىقپال ەتەدى.
جالپى قىزمەتكەرلەردىڭ بىلىكتىلىگىن ۇنەمى ارتتىرۋ، ولاردى قارجىلاي قولداۋ جانە قولايلى ەڭبەك جاعدايلارىن جاساۋ مۇراجاي ءىسىن نىعايتۋعا جانە قالانىڭ مادەني سالاسىن دامىتۋعا ىقپال ەتەدى.