ادام قۇقىقتارى جونىندەگى ۋاكىلدىڭ باسپا ءسوز قىزمەتى الماتىدا مۇمكىندىگى شەكتەۋلى ازاماتقا كولىك تۇراعىن تولەمەگەنى ءۇشىن زاڭسىز ايىپپۇل سالىنعانىن ءمالىم ەتتى، دەپ حابارلايدى اlmaty-akshamy.kz.
- ادام قۇقىقتارى جونىندەگى ۋاكىلدىڭ الماتىداعى وكىلىنە 2-توپ مۇگەدەكتىگى بار ارىزدانۋشى حابارلاستى. ونىڭ ايتۋىنشا، اقىلى اۆتوتۇراق ونىڭ ءۇيىنىڭ جانىنداعى، كىرەبەرىستەگى اۋماقتا ورنالاسقان. ءوتىنىش بەرۋشى دەنساۋلىعى بويىنشا ەرەكشە قاجەتتىلىكتەرى بار ادام بولعاندىقتان، ول ءوز كولىگىن كىرەبەرىستىڭ جانىنا قويۋعا ءماجبۇر، ءبىراق ۆيدەوبوت وعان تۇراق اقىسىن تولەمەگەنى ءۇشىن اۆتوماتتى تۇردە ايىپپۇل سالعان. وعان قاتىستى بارلىعى 8 اكىمشىلىك حاتتاما تولتىرىلعان. ۋاكىل وكىلىنىڭ باستاماسىمەن بۇل ماسەلە اكىمدىك پەن «الماتى پاركينگ» كومپانياسىنىڭ قاتىسۋىمەن وتكەن جيىندا تالقىلاندى. جيىن قورىتىندىسى بويىنشا اكىمشىلىك وكىلدەرى ماسەلەنى 3-توقساننىڭ سوڭىنا دەيىن شەشىپ، عيمارات تۇرعىندارى ءۇشىن كولىك تۇراعىن تەگىن ەتۋگە ۋادە بەردى، - دەپ حابارلادى مەكەمەدەن.
سونداي-اق اقجۋ باسپا ءسوز قىزمەتى الماتى اكىمشىلىك پوليسيا باسقارماسىنا ارىزدانۋشىنىڭ قۇقىق بۇزۋشىلىقتارىن جويۋ تۋرالى حات جولدانىپ، قازىرگى ۋاقىتتا وعان قاتىستى بارلىق ۇيعارىمداردىڭ كۇشى تولىعىمەن جويىلعانىن اتاپ ءوتتى. ال بۇرىن ءوندىرىپ الىنعان سوما تۇرعىننىڭ ءوز شوتىنا قايتارىلعان.