«ءقاۋىپسىز جول» جەدەل-الدىن الۋ ءىس-شاراسى اياسىندا الماتىلىقتار جولداعى قاۋىپسىزدىكتى قامتاماسىز ەتۋ ءۇشىن بەلسەندى جۇمىس ىستەپ جاتىر.
اسىرەسە موپەد پەن موتوكولىك يەلەرى ەرەكشە نازارعا الىنعان. 2025 جىلدىڭ 5 ساۋىرىنەن باستاپ ولارعا قويىلاتىن جاڭا ەرەجە كۇشىنە ەندى، دەپ حابارلايدى aqshamnews.kz.
وڭىرلىك كوممۋنيكاسيالار قىزمەتىندە وتكەن باسپاسوز-كونفەرەنسياسىندا، الماتىداعى پوليسيا دەپارتامەنتىنىڭ وكىلى سالتانات ازىربەك وسىلاي دەپ حابارلادى.
سالتانات ازىربەكتىڭ ايتۋىنشا، ەندى موپەد جۇرگىزەتىندەر ءتيىستى ساناتتاعى جۇرگىزۋشى كۋالىگىن، مەملەكەتتىك تىركەۋ ءنومىرىن، تەحنيكالىق پاسپورت پەن ساقتاندىرۋ ءپوليسىن الىپ، كولىگىن تەحنيكالىق بايقاۋدان وتكزۋى ءتيىس.
«بۇلاردى زاڭدى ورىنداۋ ءۇشىن عانا ەمەس، ادام ءومىرىن امان ساقتاپ قالۋ ءۇشىن دە قولعا الىپ وتىرمىز. بۇل جول اپاتىن ازايتىپ، ءتارتىپتى كۇشەيتۋگە باعىتتالعان»، - دەپ اتاپ ءوتتى سالتانات ازىربەك.
ونىڭ ايتۋىنشا، تۇسىندىرمە جۇمىسىن جۇرگىزىپ جاتقانىمەن، زاڭ بۇزاتىندار ءالى دە ازايماي وتىر. سوڭعى اپتادا الماتىدا وسىنداي 1،5 مىڭنان استام زاڭ بۇزۋشىلىق تىركەلىپتى. ونىڭ ىشىندە موپەدىن ۋاقىتىلى تىركەمەگەندەر، جۇرگىزۋشى كۋالىگى جوقتار، كولىكتى ماس بولىپ جۇرگىزگەندەر مەن باسقا دا زاڭ بۇزعاندارى دا بار.
بۇلاردان بولەك، الماتىدا وسى موپەدشىلەردىڭ كەسىرىنەن 233 جول اپاتى بولىپ، 243 ادام زارداپ شەككەن. 500-گە جۋىق موپەد ايىپ تۇراعىنا قويىلعان.
«جولدا ابايلاپ جۇرمەسە بولمايدى. ول موپەد، ماشينا دەپ ەشكىمدى بولمەيدى. سوندىقتان جول ءجۇرۋ ەرەجەسىن ساقتاۋ – اركىمنىڭ ازاماتتىق بورىشى بولۋى ءتيىس»، - دەپ قوستى سالتانات ازىربەك.
دەگەنمەن، زاڭعا باعىنعان 12 مىڭنان استام ادام كولىك قۇرالىن زاڭداستىرىپ، مەملەكەتتىك تىركەۋ ءنومىرىن، جۇرگىزۋشى كۋالىگىن الىپ، ساقتاندىرۋ ءپوليسىن راسىمدەپ ۇلگەرگەن.
«الماتىنىڭ پوليسياسى ءالى دە رەيدكە شىعىپ، تۇسىندىرمە جۇمىسىن جۇرگىزىپ جاتىر. ءبىزدىڭ تالاپ – قاتاڭ، ءبىراق ءبارى زاڭ اياسىندا بولماق. ماقساتىمىز – جول قاتىناسىن بارىنشا ءقاۋىپسىز قىلۋ»، - دەپ قورىتتى جيىننىڭ سوڭىندا سالتانات ازىربەك.