«الەۋمەتتىك ءاميان» جۇيەسى – الەۋمەتتىك كومەك الاتىن وتباسىلاردىڭ بالالارىنا مەكتەپتە تەگىن ىستىق تاماق بەرۋدى اۆتوماتتاندىراتىن جاڭا سيفرلىق شەشىم.
بۇل جۇيە اتا-انالاردان قاعاز قۇجات جيناۋدى قاجەت ەتپەيدى، قاجەتتىلىك مەملەكەتتىك دەرەكتەر بازاسى ارقىلى اۆتوماتتى تۇردە انىقتالادى. اتا-انا كەلىسىم بەرگەن سوڭ، eGov mobile قوسىمشاسىندا سيفرلىق ۆاۋچەر ىسكە قوسىلادى، دەپ حابارلايدى aqshamnews.kz.
وقۋشى مەكتەپ اسحاناسىندا QR-كود، كارتا نەمەسە Face ID ارقىلى تاماق الادى، ال اتا-انانىڭ تەلەفونىنا حابارلاما كەلەدى. تاعام ساپاسىنا باعا بەرۋ جانە كەرى بايلانىس قاراستىرىلعان. قازىرگى تاڭدا بۇل جۇيە استانا مەن قوستاناي وبلىسىنداعى 20 مەكتەپتە پيلوتتىق رەجيمدە جۇمىس ىستەۋدە. بولاشاقتا 1–4 سىنىپ وقۋشىلارىنا دا ەنگىزۋ جوسپارلانۋدا.
كۇتىلەتىن ناتيجەلەر:
• كومەكتىڭ شىنايى مۇقتاجدارعا جەتۋى
• قىزمەت كورسەتۋ بارىسىنىڭ اشىقتىعى
• اتا-انالار ءۇشىن ىڭعايلى باقىلاۋ
• مەكتەپ پەن جەتكىزۋشىلەر جۇمىسىنىڭ جەڭىلدەۋى
• ءادىل ءارى ناقتى تولەم جۇيەسى