الماتىدا قازاقستاننىڭ، شۆەسيانىڭ، گرۋزيانىڭ، رەسەيدىڭ جانە باسقا دا جاقىن جانە الىس شەتەلدەردىڭ جەتەكشى ساراپشىلارىنىڭ قاتىسۋىمەن، ەلدىڭ جەتەكشى كاسىبي مەديسينالىق قاۋىمداستىقتارىنىڭ قولداۋىمەن ق ر دەنساۋلىق ساقتاۋ مينيسترلىگىنىڭ جانە كارديولوگيا جانە ىشكى اۋرۋلار عزي ۇيىمداستىرۋىمەن «مەتابوليكالىق سيندروم – 2025: ءححى عاسىردىڭ جاھاندىق ترەندتەرى مەن سىن-قاتەرلەرى» تاقىرىبىندا حالىقارالىق عىلىمي-پراكتيكالىق كونفەرەنسيا ءوتتى.
مەتابوليكالىق سيندروم – قازىرگى كلينيكالىق تاجىريبەدەگى ەڭ وزەكتى جاعدايلاردىڭ ءبىرى، 2 ءتيپتى قانت ديابەتى، جۇرەك-قان تامىرلارى اۋرۋلارى، الكوگولسىز باۋىردى ماي باسۋ اۋرۋلارى، سەمىزدىك جانە باسقا سوزىلمالى ينفەكسيالىق ەمەس اۋرۋلاردىڭ دامۋىمەن تىعىز بايلانىستى. دۇنيەجۇزىلىك دەنساۋلىق ساقتاۋ ۇيىمى الەمدەگى ەرەسەك تۇرعىنداردىڭ 25%-دان استامىندا مەتابوليكالىق سيندروم بەلگىلەرى بار دەپ ەسەپتەيدى.
ءىس-شارانىڭ نەگىزگى ماقساتى – مەتابوليكالىق بۇزىلۋلاردى دياگنوستيكالاۋ، الدىن الۋ جانە ەمدەۋ ماسەلەلەرىندە مەديسينانىڭ ءارتۇرلى باعىتتارىنداعى مامانداردىڭ حاباردارلىعىن ارتتىرۋ. كونگرەسس گاستروەنتەرولوگيا، ەندوكرينولوگيا، كارديولوگيا، تاماقتانۋدى قولداۋ، بارياتريالىق حيرۋرگيا جانە كوموربيدتى ناۋقاستاردى باسقارۋدىڭ پسيحوالەۋمەتتىك اسپەكتىلەرى تۋرالى وزەكتى تاقىرىپتاردى تارقاتتى.
– مەتابوليكالىق سيندروم ءپانارالىق پروبلەما بولعاندىقتان، ءبىزدىڭ ينستيتۋت تاجىريبە الماسۋ الاڭىنا اينالدى. ماماندارىمىز وسى سالادا ءبىلىم بەرۋ جانە عىلىمي جوبالاردى جۇزەگە اسىرۋدا. ءبىز حالىقارالىق ساراپشىلاردى شاقىرىپ، تاجىريبە الماسىپ، جاڭا ترەندتەردى تالقىلاپ، پروبلەمالاردى شەشۋ جولدارىن ىزدەيمىز، – دەدى كونگرەسس قاتىسۋشىلارى الدىندا ءسوز سويلەگەن كىاعزي باسقارما ءتوراعاسىنىڭ عىلىمي-كلينيكالىق جانە يننوۆاسيالىق قىزمەت جونىندەگى ورىنباسارى جاميليا قايبۋللايەۆا.
ال ينستيتۋتتىڭ ەندوكرينولوگيا كافەدراسىنىڭ مەڭگەرۋشىسى، ق ر دەنساۋلىق ساقتاۋ مينيسترلىگىنىڭ باس ەندوكرينولوگى لاۋرا دانياروۆا بۇل دەرتتىڭ جاستار اراسىندا جيىلەپ بارا جاتقانىن جانە بۇل ءۇردىس بۇكىل الەمدە دە بايقالاتىنىن اتاپ ءوتتى.
«بۇگىن ءبىز 2 ءتيپتى قانت ديابەتىنىڭ بارياتريالىق نەمەسە مەتابوليكالىق حيرۋرگياسى سياقتى وزەكتى تاقىرىپتى قاراستىرىپ جاتىرمىز. بۇل 2 ءتيپتى قانت ديابەتىن ەمدەۋدىڭ، حيرۋرگيالىق ادىستەردى قولدانۋدىڭ جاڭا ستاندارتتارىنىڭ ءبىرى»، – دەدى دارىگەر.
گرۋزيادان كەلگەن پروفەسسور، م.ع.د.، ەندوكرينولوگ ەلەنا گيورگادزە مەتابوليكالىق بۇزىلىستارىنىڭ نەگىزگى سەبەبى ادامنىڭ ءومىر سۇرۋ سالتى: قيمىلسىزدىق، ارتىق تاماقتانۋ جانە تاماقتانۋ ءتارتىبىنىڭ بۇزىلۋى دەپ سانايدى. سوزىلمالى جۇقپالى ەمەس اۋرۋلاردىڭ وسۋىمەن ەلدەر اراسىندا ءبىلىم الماسۋ ماڭىزدى بولىپ وتىر.
كونگرەسس تاقىرىپتارىنىڭ ىشىندە سەمىزدىكتى، قانت ديابەتىن، باۋىردىڭ مەتابوليكالىق-اسسوسياسيالانعان ستەاتوتيكالىق اۋرۋىن ەمدەۋگە، ەندوكريندىك بۇزىلۋلاردى دياگنوستيكالاۋ مەن ەمدەۋدىڭ، بارياتريالىق حيرۋرگيا مەن نۋتريتيۆتىك قولداۋدىڭ سونداي-اق پاسيەنتتەردى باقىلاۋدىڭ پسيحوسوماتيكالىق اسپەكتىلەرىنىڭ زاماناۋي ادىس-تاسىلدەرىنە ەرەكشە نازار اۋدارىلدى.
كونگرەسس رەسپۋبليكادا ءپانارالىق كوزقاراستى قالىپتاستىرۋعا جانە مەديسينالىق كومەكتىڭ ساپاسىن جەتىلدىرۋگە ماڭىزدى ۇلەس قوسپاق.