اقتوبە وڭىرىندە ءجۇن وڭدەپ، توقىما ەمەس ماتەريالدار وندىرەتىن زاۋىت سالۋ بويىنشا ينۆەستيسيالىق جوبا جۇزەگە اسىرىلۋدا. جوبانىڭ باستاماشىسى — يتالياندىق CORMATEX كومپانياسىنىڭ تەحنيكالىق قولداۋىمەن جۇمىس ىستەيتىن «KazFeltec» ج ش س.
CORMATEX — توقىما ونەركاسىبىنە ارنالعان زاماناۋي تەحنولوگيالارعا ماماندانعان كومپانيا.
زاۋىتتا جوعارى ساپالى ءونىم شىعارۋعا مۇمكىندىك بەرەتىن Lap FormAir تەحنولوگياسى قولدانىلماق، دەپ حابارلايدى aqshamnews.kz.
جوبانى ىسكە اسىرۋ 2020 جىلى باستالدى. قازىرگى ۋاقىتتا قۇرىلىس-مونتاج جۇمىستارى جۇرگىزىلۋدە. جابدىقتاردى ىسكە قوسۋ جانە سىناقتان وتكىزۋ 2025 جىلدىڭ تامىزىنا جوسپارلانعان.
كاسىپورىن جىل سايىن 2000 توننادان استام شيكىزاتتى وڭدەۋگە قاۋقارلى بولادى. شيكىزات رەتىندە تابيعي جانە سينتەتيكالىق تالشىقتار، سونداي-اق توقىما ءوندىرىسىنىڭ قالدىقتارى پايدالانىلاتىن بولادى. زاۋىت قۇرىلىس، ماشينا جاساۋ، قاپتاما جانە ءسۇزۋ جۇيەلەرى ءۇشىن كەڭىنەن قولدانىلاتىن توقىما ەمەس ماتەريالداردىڭ الۋان ءتۇرىن شىعارادى. دايىن ءونىم ىشكى نارىققا دا، سىرتقى نارىققا دا جەتكىزىلەدى.
جوبانىڭ نەگىزگى باعىتتارىنىڭ ءبىرى — قوي جۇنىنەن جاسالعان جىلۋ جانە دىبىس وقشاۋلاعىش تاقتالار مەن رۋلوندار ءوندىرىسى. بۇل باعىت ماركەتينگتىك زەرتتەۋلەر ناتيجەسىندە بيزنەس-جوسپاردا باسىم باعىت رەتىندە ايقىندالدى.
جوبا اياسىندا 50-دەن استام جاڭا جۇمىس ورنى اشىلادى. سونىمەن قاتار، قازاقستاندىق جاس مامانداردى دايارلاۋعا ەرەكشە كوڭىل بولىنەدى — ولار زاماناۋي، جوعارى تەحنولوگيالى جابدىقتاردا پراكتيكالىق تاجىريبە جيناقتايدى.
جوبا مەملەكەتتىك قولداۋمەن جۇزەگە اسىرىلۋدا. اتاپ ايتقاندا، تەحنيكا مەن جابدىق ساتىپ الۋعا كەتكەن شىعىننىڭ 25%-نا دەيىنگى كولەمىندە ينۆەستيسيالىق سۋبسيديالار قاراستىرىلعان.
جاڭا ءوندىرىس ورنى وڭىردەگى قايتا وڭدەۋ ونەركاسىبىنىڭ دامۋىنا تىڭ سەرپىن بەرىپ، جاڭا جۇمىس ورىندارىن اشۋعا، سونداي-اق بۇرىن پايدالانىلماي كەلگەن جەرگىلىكتى شيكىزاتتى — قوي ءجۇنىن ءتيىمدى يگەرۋگە مۇمكىندىك بەرەدى.