الماتى قالاسىندا سىبايلاس جەمقورلىققا قارسى قىزمەت باستاماسىمەن سىرتقى ەكونوميكالىق قىزمەتكە قاتىسۋشىلاردىڭ پروبلەمالىق ماسەلەلەرىن تالقىلاۋ بويىنشا دوڭگەلەك ۇستەل ءوتتى، دەپ حابارلايدى اlmaty-akshamy.kz.
تالقىلاۋعا مەملەكەتتىك ورگانداردىڭ قىزمەتكەرلەرى، «اتامەكەن» ۇكپ باسشىلارى، قوعام قايراتكەرلەرى مەن كاسىپكەرلىك قوعامداستىقتاردىڭ وكىلدەرى قاتىستى.
ءىس-شارا باسىندا الماتى قالاسى، الماتى جانە جامبىل وبلىستارىنىڭ كەدەن بەكەتتەرىنىڭ باسشىلارى كاسىپكەرلەر ءۇشىن كەدەندىك راسىمدەر ماسەلەلەرى بويىنشا كەڭەس وتكىزدى.
بيزنەس-ومبۋدسمەن رۋستام ءجۇرسىنوۆ ءىس-شارانى اشا وتىرىپ، نەگىزىنەن سىرتقى ەكونوميكالىق قىزمەتكە قاتىسۋشىلاردى كەدەندىك شەكارا ارقىلى تاۋارلار مەن كولىك قۇرالدارىن وتكىزۋگە قاتىستى ماسەلەلەر تولعاندىراتىنىن اتاپ ءوتتى.
كاسىپكەرلەر كەدەن بەكەتتەرىنىڭ وتكىزۋ قابىلەتى، جۇكتەردى راسىمدەۋ كەزىندە ارتىق قۇجاتتاندىرۋ، سىبايلاس جەمقورلىق تاۋەكەلدەرىن تۋدىراتىن حالىقارالىق تاسىمالدارعا ارنالعان بلانكىلەردىڭ تاپشىلىعى مەن الىپساتارلىعى بويىنشا ماسەلەلەردى كوتەردى.
«كاسىپكەرلەردى قورعاۋ سىبايلاس جەمقورلىققا قارسى قىزمەت ورگاندارى قىزمەتىنىڭ باسىم باعىتتارىنىڭ ءبىرى بولىپ تابىلادى. زاڭنامالىق جانە ۇيىمداستىرۋشىلىق سيپاتتاعى قابىلدانىپ جاتقان شارالارعا قاراماستان، شەشۋدى تالاپ ەتەتىن كوپتەگەن ماسەلەلەر بار»، - دەپ الماتى قالاسىنىڭ سىبايلاس جەمقورلىققا قارسى قىزمەتىنىڭ باسشىسى اسحات ورازحان اتاپ ءوتتى.
كاسىپكەرلەرگە كەلىپ تۇسكەن بارلىق سۇراقتار بويىنشا مەملەكەتتىك ورگاندار تولىق تۇسىنىكتەمەلەر بەردى، ءبىرقاتار ناقتى وتىنىشتەر باقىلاۋعا الىندى.
وسىلايشا، قارجى مينيسترلىگى مەملەكەتتىك كىرىستەر كوميتەتىنىڭ وكىلى سەرىك جانايداروۆ سىرتقى ەكونوميكالىق قىزمەتكە قاتىسۋشىلاردىڭ ايتىلعان ماسەلەلەرىن شەشۋ بويىنشا بارلىق شارالار قابىلداناتىنىن اتاپ كەتتى.
جالپى تالقىلاۋ بارىسىندا سىرتقى ەكونوميكالىق قىزمەت سالاسىنداعى كاسىپكەرلىكتى قولداۋ بويىنشا مەملەكەتتىك ساياساتتىڭ تيىمدىلىگىن ارتتىرۋعا باعىتتالعان ءبىرقاتار ۇسىنىمدار ايتىلدى.
دوڭگەلەك ۇستەل سوڭىندا قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆ بۇگىندە ايتىلعان بارلىق پروبلەمالاردىڭ 90%-ى وڭىرلىك دەڭگەيدە شەشىلۋى مۇمكىن ەكەنىن اتاپ ءوتتى. سۇراقتاردىڭ باسىم بولىگى «اتامەكەن" ۇكپ-نىڭ باقىلاۋىنا الىندى.