بيىل ءۇيىرلى شەگىرتكەلەر 997،2 مىڭ گەكتار جەرگە تارالعان.
قازاقستان ۇكىمەتى ۇستىمىزدەگى جىلى شەگىرتكەمەن جۇرگىزىلەتىن كۇرەسكە قانشا قاراجات جۇمسالاتىنىن ايتتى، دەپ حابارلايدى Almaty-akshamy.kz.
اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكسيا كوميتەتىنىڭ ءتوراعاسى المابەك مارستىڭ ايتۋىنشا،ەلىمىزدە شەگىرتكەلەرمەن كۇرەس جۇمىستارى قارقىندى جۇرگىزىلىپ جاتىر.
«رەسپۋبليكا اۋماعىندا ەرەكشە ءقاۋىپتى ورگانيزمنىڭ 12 ءتۇرى، زياندى ورگانيزمدەردىڭ 5 ءتۇرى، كارانتيندىك وبەكتىلەردىڭ 14 ءتۇرى تارالعان. شەگىرتكەلەرمەن كۇرەسۋگە ەرەكشە كوڭىل بولىنەدى. بيىل ءۇيىرلى شەگىرتكەلەر 997،2 مىڭ گەكتار جەرگە تارالعان. ونىڭ ىشىندە يتالياندىق پرۋس 760،6 مىڭ گەكتار، ازيالىق شەگىرتكەلەر 201،0 مىڭ گەكتار جانە ماروككو شەگىرتكەلەرى 35،5 مىڭ گەكتار جەردەن انىقتالدى. سونىمەن قاتار ساياق شەگىرتكە زيانكەستەرى 270،0 مىڭ گەكتار جەردەن بايقالدى»، - دەپ اتاپ ءوتتى ۆەدومستۆو باسشىسى.
سونىمەن قاتار ول زيانكەستەرگە قارسى قازىنادان قانشا قاراجات بولىنگەنىن ايتتى.
«جالپى، شەگىرتكەلەرگە قارسى كۇرەسكە رەسپۋبليكالىق جانە جەرگىلىكتى بيۋدجەتتەردەن 2،5 ملرد تەڭگە ءبولىندى. قارجى قۇرالدارى پەستيسيدتەر مەن حيميالىق وڭدەۋ بويىنشا قىزمەتتەردى بارلىق بولجانعان الاڭعا ساتىپ الۋعا مۇمكىندىك بەردى. ءۇيىرلى شەگىرتكەلەرگە قارسى ءتيىمدى وڭدەۋ جۇرگىزۋ ءۇشىن پەستيسيدتەردىڭ ءارتۇرلى توپتارىنداعى پرەپاراتتارى ساتىپ الىندى. وبلىس اكىمدىكتەرىمەن بىرلەسىپ، وڭىرلەردە وبلىس اكىمدەرىنىڭ ورىنباسارلارى باسقاراتىن جەدەل شتابتار قۇرىلدى جانە مونيتورينگپەن حيميالىق وڭدەۋ جۇمىستاردى ۇيىمداستىرۋ جۇمىس جوسپارلارى بەكىتىلدى»، - دەدى كوميتەت ءتوراعاسى.