بيىل الماتىدا مەكتەپتەر ءۇشىن ينتەراكتيۆتى كونتەنتى بار 168 جاڭا موديفيكاسيا كابينەتى ساتىپ الىندى. بۇل تۋرالى قالا اكىمى ەربولات دوسايەۆ ءبىلىم بەرۋ سالاسى قىزمەتكەرلەرىنىڭ تامىز كەڭەسىندە مالىمدەدى، دەپ حابارلايدى aqshamnews.kz
شاھار باسشىسى قالاداعى مەكتەپتەردىڭ ينفراقۇرىلىمىنا باسا نازار اۋدارىلاتىنىن اتادى.
«بيىل مەكتەپتەرگە پراكتيكالىق جانە تەوريالىق ەسەپتەردى شەشۋ ءۇشىن ينتەراكتيۆتى مازمۇنى بار 168 جاڭا موديفيكاسيا كابينەتى (فيزيكا، حيميا، بيولوگيا، روبوتوتەحنيكا، STEM) ساتىپ الىندى. بۇل مەكتەپتەردى زاماناۋي پاندىك كابينەتتەرمەن جابدىقتاۋدىڭ 85% دەڭگەيىنە قول جەتكىزۋگە مۇمكىندىك بەردى»، - دەدى ەربولات دوسايەۆ.
وسىلايشا، 168 جاڭا كابينەتتىڭ ەنگىزىلۋىمەن مەكتەپتەردى زاماناۋي پاندىك كابينەتتەرمەن جابدىقتاۋ وتكەن جىلمەن سالىستىرعاندا 16% ءوستى.
سونىمەن قاتار، ۇلتتىق بانكتىڭ ۇلتتىق تولەم كورپوراسياسىمەن بىرلەسىپ №201 مەكتەپ-گيمنازياسىندا «سيفرلىق تەڭگە» پلاتفورماسىندا باستاۋىش سىنىپ وقۋشىلارىن تەگىن تاماقتاندىرۋعا ارنالعان «سيفرلىق ۆاۋچەرلەر» باعدارلاماسى ءساتتى جۇزەگە اسىپ كەلەدى. بۇل باعدارلاما بويىنشا بۇگىندە 50 مىڭعا جۋىق ترانزاكسيا جۇرگىزىلدى.
«الداعى ۋاقىتتا جوبانى قالانىڭ باسقا مەكتەپتەرىنە دە ەنگىزۋدى جوسپارلانىپ وتىرمىز»، - دەدى الماتى اكىمى.
ەستەرىڭىزگە سالا كەتەيىك، الماتىدا 2024-2025 وقۋ جىلىنىڭ باستاۋىنا ورايلاستىرىلعان «Digital Kazakhstan: جاڭا زامانداعى ءبىلىم بەرۋ» اتتى قالالىق تامىز ءسامميتى ءوتتى. ءىس-شارا پەداگوگتاردىڭ كاسىبي دەڭگەيىن ارتتىرۋعا، ءبىلىم بەرۋ سالاسىنداعى وزىق تاجىريبەلەردى جانە جاڭا تەحنولوگيالاردى الماسۋعا باعىتتالعان.