ادام پاپيللوما ۆيرۋسىنا (اپۆ) قارسى ەگۋ دەنساۋلىق ساقتاۋ سالاسىنداعى، اسىرەسە ءجاسوسپىرىم قىزدار ءۇشىن بارعان سايىن وزەكتى تاقىرىپ بولىپ كەلەدى. اپۆ جاتىر موينى وبىرى مەن باسقا دا قاتەرلى ىسىكتىڭ نەگىزگى سەبەبىنىڭ ءبىرى. سوندىقتان بۇل ۆيرۋستىڭ الدىن الۋ وتە ماڭىزدى، دەيدى الماتى №36 قالالىق ەمحانانىڭ دارىگەرى قارلىعاش قالييەۆا.
دارىگەر ەگۋدىڭ نەگىزگى سەبەبىن جاتىر موينى وبىرىنىڭ الدىن الۋ دەپ سانايدى، ويتكەنى ادام پاپيللوما ۆيرۋسى وسى اۋرۋدىڭ دامۋىنىڭ نەگىزگى ءقاۋىپ فاكتورى.
جىنىستىق بەلسەندىلىككە دەيىن اتالعان ەكپەنى ەگۋ ۆيرۋستى جۇقتىرۋ مۇمكىندىگىن تولىعىمەن جويادى جانە، تيىسىنشە، قاتەرلى ىسىك اۋرۋىنىڭ دامۋ ءقاۋپىن ازايتادى.
«كلينيكالىق زەرتتەۋلەر كورسەتكەندەي، ادام اپۆ تاسىمالداۋشىسىمەن بايلانىستا بولماعان جاعدايدا ۆاكسينا 91-100% ءتيىمدى. بۇل ەكپەنى دەنساۋلىقتى قورعاۋداعى ماڭىزدى قادامعا اينالدىرادى»، - دەيدى قارلىعاش قالييەۆا.
اپۆ ەكپەسى ءقاۋىپسىز جانە جاقسى ءتوزىمدى. ىقتيمال جاناما اسەرلەر ادەتتە جەڭىل ءارى قىسقا مەرزىمدى. ۆاكسينا ۇرپاقتى بولۋ فۋنكسياسىنا اسەر ەتپەيتىنىن ەسكەرۋ ماڭىزدى.
اپۆ ەكپەسى مىندەتتى كۇنتىزبەگە ەنگىزىلگەن ەلدەردە جاتىر موينى وبىرىنىڭ سىرقاتتانۋشىلىق دەڭگەيى ايتارلىقتاي تومەندەدى. بۇل اتالعان ەكپە ەگۋ باعدارلاماسىنىڭ جوعارى تيىمدىلىگىن كورسەتەدى.
ەستەرىڭىزگە سالا كەتەيىك، قازاقستاندا 2024 جىلدىڭ قىركۇيەگىنەن باستاپ اتا-انا كەلىسىمىمەن 11 جاستاعى ءجاسوسپىرىم قىزداردى اپۆ-عا قارسى ۆاكسيناسيالاۋ باستالادى.
«2024 جىلدىڭ قىركۇيەگىندە باستالاتىن ناۋقان اتا-انا مەن قالىڭ قاۋىمنىڭ قولداۋى مەن ءتۇسىنۋىن تالاپ ەتەدى. ۆاكسيناسيا جاتىر موينى وبىرىنان بولاتىن اۋرۋشاڭدىق پەن ءولىم-جىتىمدى ايتارلىقتاي تومەندەتۋى مۇمكىن، بۇل بولاشاقتا اتالعان ماسەلەنى تولىعىمەن جويۋ تۋرالى ايتۋعا مۇمكىندىك بەرەدى»، - دەپ تۇيىندەدى دارىگەر.