مەكتەپكە دەيىنگى ءبىلىم بەرۋ الماتىنىڭ الەۋمەتتىك سالاسىن دامىتۋدىڭ باسىم باعىتتارىنىڭ ءبىرى بولىپ قالا بەرەدى.
بالاباقشا جەلىسىن كەڭەيتۋ، كورسەتىلەتىن قىزمەتتىڭ ساپاسىن ارتتىرۋ جانە ينفراقۇرىلىمدى جاڭعىرتۋ جۇيەلى تالداۋدى ءارى جوسپارلاردى ۇيلەستىرۋدى تالاپ ەتەدى، - دەپ حابارلايدى Aqshamnews.kz.
بۇل ماسەلەلەر الماتى قالاسى اكىمىنىڭ ورىنباسارى ابزال نۇكەنوۆتىڭ توراعالىعىمەن وقۋشىلار سارايىندا وتكەن كەڭەيتىلگەن وتىرىستا قارالدى. جيىن اياسىندا جاڭارتىلعان دەرەكتەر ۇسىنىلىپ، 2026 جىلعا ارنالعان سالانى دامىتۋ باسىمدىقتارى ايقىندالدى.
الماتى قالاسىنىڭ ءبىلىم باسقارماسىنىڭ مالىمەتىنشە، بۇگىندە قالادا 1 066 مەكتەپكە دەيىنگى ۇيىم جۇمىس ىستەيدى. وندا 84 766 بالا تاربيەلەنۋدە. ەكى جاستان التى جاسقا دەيىنگى بالالاردى قامتۋ دەڭگەيى 98 پايىزعا جەتكەن.
«كەزەكتى قىسقارتۋعا باعىتتالعان پيلوتتىق جوبانىڭ تيىمدىلىگى دالەلدەنىپ وتىر: 2026 جىلعى 1 شىلدەگە قاراي كەزەك 40 مىڭ بالانى قۇراۋعا ءتيىس، ال جەلتوقسان ايىنا دەيىن 14 636 بالاعا دەيىن قىسقارادى»، – دەدى قالالىق ءبىلىم باسقارماسى باسشىسىنىڭ ورىنباسارى بيبىگۇل مالعاجداروۆا.
جيىندا ينكليۋزيۆتى ءبىلىم بەرۋ مەن كادرلىق قامتاماسىز ەتۋ ماسەلەلەرى دە جەكە قارالدى. قازىرگى تاڭدا 117 مەملەكەتتىك بالاباقشادا ەرەكشە ءبىلىم بەرۋ قاجەتتىلىگى بار بالالارعا قولداۋ كورسەتەتىن ماماندار جۇمىس ىستەيدى. بيبىگۇل مالعاجداروۆانىڭ ايتۋىنشا، ينفراقۇرىلىمدى جاڭعىرتۋ، پەداگوگتەردىڭ بىلىكتىلىگىن ارتتىرۋ جانە قاۋىپسىزدىك شارالارىن كۇشەيتۋ – اتالعان قۇرىلىم ءۇشىن الداعى جىلعا نەگىزگى مىندەتتەردىڭ ءبىرى بولىپ قالا بەرەدى.
وتىرىس اياسىندا قالاداعى سانيتارلىق-ەپيدەميولوگيالىق باقىلاۋ دەپارتامەنتى جۇرگىزگەن تەكسەرۋ ناتيجەلەرى دە ايتىلدى. انىقتالعان بۇزۋشىلىقتار سانيتارلىق تالاپتاردىڭ ساقتالۋىنا، ءۇي-جايلاردىڭ جاعدايىنا، تاماقتانۋدى ۇيىمداستىرۋ شارتتارىنا جانە وندىرىستىك باقىلاۋدىڭ جۇرگىزىلۋىنە قاتىستى بولعان.
«تەكسەرۋ ناتيجەلەرى مەكتەپكە دەيىنگى ۇيىمداردىڭ بارلىعى بىردەي بەلگىلەنگەن نورماتيۆتەرگە ساي جاعداي جاساي بەرمەيتىنىن كورسەتتى. ءبىزدىڭ مىندەت – بۇزۋشىلىقتاردى تىركەۋمەن شەكتەلمەي، ولاردىڭ تولىق جويىلۋىنا قول جەتكىزۋ»، – دەدى دەپارتامەنت باسشىسىنىڭ سانيتارلىق-گيگيەنالىق ماسەلەلەر جونىندەگى ورىنباسارى گاۋحار كاتكەنوۆا.
ونىڭ ايتۋىنشا، جەكە جانە مەملەكەتتىك بالاباقشالارمەن پروفيلاكتيكالىق جۇمىس، سونىڭ ىشىندە سانيتارلىق قورعاۋ دەڭگەيىن ارتتىرۋ باعىتىندا، كۇشەيتىلىپ جاتىر.
جيىندا ءورت قاۋىپسىزدىگى ماسەلەلەرى دە كوتەرىلدى. ءبىر جىل ىشىندە 144 بالاباقشا تەكسەرىلىپ، ناتيجەسىندە شامامەن 2 مىڭ بۇزۋشىلىق انىقتالعان. ولاردىڭ قاتارىندا حابارلاۋ جۇيەسىنىڭ تالاپقا ساي بولماۋى، ەۆاكۋاسيا جولدارىن ۇيىمداستىرۋداعى كەمشىلىك جانە ورتكە قارسى سۋ جۇيەلەرىنىڭ جەتكىلىكسىز جارامدىلىعى بار. اكىمشىلىك ايىپپۇلداردىڭ جالپى سوماسى 6،6 ملن تەڭگەگە جەتتى.
وتىرىستى قورىتىندىلاي كەلە، الماتى قالاسى اكىمىنىڭ ورىنباسارى ابزال نۇكەنوۆ ۇسىنىلعان دەرەكتەر مەكتەپكە دەيىنگى ءبىلىم بەرۋ سالاسىن جۇيەلى تۇردە جاڭارتۋدىڭ قاجەتتىلىگىن ايقىن كورسەتىپ وتىرعانىن اتاپ ءوتتى. ول ءبىلىم بەرۋ ساپاسىنا باقىلاۋدى كۇشەيتۋگە، كادرلىق ماسەلەلەردى جەدەل شەشۋگە، بالاباقشا باسشىلارىنىڭ جەكە جاۋاپكەرشىلىگىن ارتتىرۋعا جانە ينفراقۇرىلىمدىق جوسپارلاردىڭ مۇلتىكسىز ورىندالۋىنا ەرەكشە نازار اۋداردى. سونداي-اق، ۆەدومستۆوارالىق ءوزارا ءىس-قيمىلدى نىعايتىپ، بالالاردى قابىلداۋ مەن قاۋىپسىزدىگىنە قاتىستى بارلىق راسىمدەردىڭ اشىقتىعىن قامتاماسىز ەتۋدى، انىقتالعان ماسەلەلەر مەن 2026 جىلعا بەلگىلەنگەن باسىمدىقتاردى ەسكەرە وتىرىپ، جاڭارتىلعان ءىس-شارالار جوسپارىن ۇسىنۋدى تاپسىردى.