الماتىلىق تۇلەكتەرگە اتتەستاتتاردى سالتاناتتى تۇردە تاپسىرۋ 2022 جىلدىڭ 16-17 ماۋسىمىندا وتەدى.
الماتى قالاسى ءبىلىم باسقارماسى باسشىسىنىڭ ورىنباسارى قايرات جۇمانوۆ وڭىرلىك كوممۋنيكاسيالار قىزمەتىنىڭ بريفينگىندە بيىلعى جىلى مەگاپوليستە مەكتەپ ءبىتىرۋ قالاي وتەتىنى تۋرالى ايتىپ بەردى، دەپ حابارلايدى Almaty-akshamy.kz.
«25 مامىردا بارلىق تۇلەكتەر ءۇشىن سوڭعى قوڭىراۋ سوعىلدى. ءبىتىرۋ ءىس-شارالارى – بۇل 11-سىنىپ تۇلەگى ءۇشىن ونىڭ ەرەسەك ومىرگە قادام باسۋىنداعى ايتۋلى وقيعا»، - دەپ اتاپ ءوتتى قايرات جۇمانوۆ.
ول اتتەستاتتاردى سالتاناتتى تاپسىرۋ 2022 جىلعى 16-17 ماۋسىمدا وتەتىنىن حابارلادى.
«الماتى قالاسىندا اتتەستاتتى مىندەتتى تۇردە كۇندىزگى ۋاقىتتا مەكتەپ قابىرعاسىندا تاپسىرۋ ءداستۇرى قالىپتاسقان، وعان مەكتەپتىڭ پەداگوگيكالىق ۇجىمى، تۇلەكتەر، تۇلەكتەردىڭ اتا-انالارى، پەداگوگيكالىق ەڭبەك ارداگەرلەرى، قامقورشىلىق كەڭەس مۇشەلەرى، الماتى قالاسى ءبىلىم باسقارماسىنىڭ جانە باسقا دا مۇددەلى مەملەكەتتىك ورگانداردىڭ وكىلدەرى قاتىسادى»، - دەپ اتاپ ءوتتى سپيكەر.
ق.جۇمانوۆ تۇلەكتەردىڭ قايىرىمدىلىق باستامالارىن - «مەكتەپكە كىتاپ سىيلا»، «مەكتەپكە سىي» - اعاش وتىرعىزۋ، الەۋمەتتىك وسال وتباسىلار مەن بالالارعا كومەك كورسەتۋ ءۇشىن «مەيىرىمدى جۇرەكتەن – بالاعا»، «تۋعان جەرگە تاعزىم» اكسيالارىن قولدايتىنىن جەتكىزدى.
پەداگوگيكالىق ادەپتى ساقتاۋ جانە سىبايلاس جەمقورلىق قۇقىق بۇزۋشىلىقتاردىڭ الدىن الۋ ماقساتىندا مەكتەپ ءبىتىرۋ ءىس-شارالارىنا دايىندىق كەزىندە ءاربىر تۇلەككە جەكە كوزقاراس قاعيداتى ساقتالادى؛ بىتىرۋشىلەردىڭ اتا-انالارىمەن قاجەتسىز شىعىنداردىڭ ورىنسىزدىعى تۋرالى ءتۇسىندىرۋ جۇمىستارى جۇرگىزىلەدى.
الماتى قالاسى ءبىلىم باسقارماسى باسشىسىنىڭ ورىنباسارى مەكتەپ ءبىتىرۋ كەشىنە قويىلعان تىيىم تۋرالى دا ەسكە سالدى. سونىمەن ءىس-شارالاردى وتكىزۋگە انيماتورلاردى، مەرەكەلىك اگەنتتىكتەردى تارتۋعا؛ مەرەكەلىك ۇستەلدەردى ۇيىمداستىرۋعا؛ اۆتوموبيلدەردى جالعا الا وتىرىپ، قالا بويىنشا ەكسكۋرسيالاردى وتكىزۋگە؛ اكىمشىلىك پەن پەداگوگتارعا سىيلىقتار ءۇشىن اقشالاي قارجى جيناۋعا؛ مەيرامحانالار مەن كافەلەردە مەكتەپ ءبىتىرۋ ءىس-شارالارىن ۇيىمداستىرۋعا جول بەرىلمەيدى.