مەدەۋدەگى الاپات ءورتتىڭ شىعۋىنا ادام فاكتورى سەبەپ بولۋى مۇمكىن

ءورتتىڭ شىعۋ سەبەبى – اشىق وت وشاعى

مەدەۋدەگى ءىرى ءورتتىڭ شىعۋ سەبەبى تەكسەرىلىپ جاتىر. بۇل تۋرالى باسپا ءسوز ءماسليحاتى بارىسىندا الماتى قالالىق تجد باسشىسىنىڭ مىندەتىن ۋاقىتشا اتقارۋشى سامات اساينوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ايتۋىنشا، وقيعا ورنىندا دەپارتامەنت انىقتاۋشىلارى جۇمىس ىستەگەن.

كۋاگەرلەردىڭ سوزىنشە، ولار تاۋدان تومەن قاراي جۇگىرىپ كەلە جاتقان ادامداردى كورگەن، سودان كەيىن شىرشالار ورتەنە باستاعان.

كۇدىكتىلەردى انىقتاۋعا ارنالعان بارلىق ماتەريالدار مەدەۋ اۋدانىنىڭ پوليسياسىنا تاپسىرىلدى.

سوتقا دەيىنگى تەرگەۋ اياسىندا وقيعانىڭ ءمان-جايى مەن سەبەپتەرى انىقتالادى.

زەرتحانانىڭ الدىن الا قورىتىندىسى بويىنشا، ءورتتىڭ شىعۋ سەبەبى - اشىق وت وشاعى.

«گورەلنيك تاۋىنىڭ بۇل بولىگى تۋريستەرگە قاتتى ۇنايدى، ول جەرگە كەلۋشىلەر وتە كوپ. ءورتتىڭ شىعۋىنا ادام فاكتورى سەبەپ بولۋى مۇمكىن. ءبىزدىڭ انىقتاۋشىلار سول جەرگە بارىپ، كەلۋشىلەر ورتالىعىنداعى ءدامحانادا بولعان رەسپوندەنتتەردىڭ ايتۋىنشا، ەڭىس جاقتان بىرەۋ جۇگىرىپ كەلە جاتقان، سودان كەيىن شىرشالار وتقا ورانعان. وسى دەرەكتەردى نەگىزگە الا وتىرىپ، ماتەريالدار پوليسياعا جولداندى»، - دەدى سامات.اساينوۆ.

ەسكە سالايىق، 7 مامىر تۇنگى ساعات 23.00 شاماسىندا ىلە الاتاۋى مەملەكەتتىك ۇلتتىق تابيعي پاركى كىشى الماتى ورمانشىلىعى 33-اۋماعىندا ءورت شىققان بولاتىن.