الماتى قالاسىنىڭ ءار اۋدانىندا تۇرعىندارعا ساپالى جانە قولجەتىمدى مەديسينالىق كومەك كورسەتۋ ماقساتىندا اۋقىمدى جۇمىس جۇرگىزىلىپ جاتىر.
بۇل تۋرالى الماتى قالاسى اكىمىنىڭ ورىنباسارى بەيبىت شاحانوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى، - دەپ حابارلايدى Aqshamnews.kz.
ونىڭ ايتۋىنشا، الماتىلىقتاردىڭ دەنساۋلىعىن قورعاۋ – قالا اكىمدىگىنىڭ باستى مىندەتتەرىنىڭ ءبىرى. وسى باعىتتا 2030 جىلعا دەيىن مەگاپوليستە 32 جاڭا جانە 14 ەسكى مەديسينالىق نىساندى جاڭعىرتۋدى قامتيتىن 46 دەنساۋلىق ساقتاۋ مەكەمەسىن دامىتۋ باعدارلاماسى جۇزەگە اسىرىلىپ جاتىر.
بارلىق جاڭا نىساندار زاماناۋي ستاندارتتارعا ساي سالىنىپ، كلينيكالىق-دياگنوستيكالىق ورتالىقتارمەن جابدىقتالادى. بۇل مەديسينالىق قىزمەتتەردىڭ ءار تۇرعىنعا قادامدىق قولجەتىمدى بولۋىن قامتاماسىز ەتەدى.
ءقازىردىڭ وزىندە قالادا 8 جاڭا مەديسينالىق نىساننىڭ قۇرىلىسى ءجۇرىپ جاتىر. ولاردىڭ قاتارىندا:
- اۋىسىمىنا 500 ادام قابىلدايتىن 2 ەمحانا – سەركەبايەۆ كوشەسىندە جانە قۇرامىس شاعىناۋدانىندا؛
- اۋىسىمىنا 400 ادام قابىلدايتىن 2 دارىگەرلىك امبۋلاتوريا – سايالى شاعىناۋدانىندا جانە ايباسوۆ كوشەسىندە؛
- جىلىنا 50 مىڭ شاقىرتۋعا ەسەپتەلگەن جەدەل جاردەم قوسالقى ستانسياسى (4-پودستانسيا).
سونىمەن قاتار، ءۇش نىساندا سەيسميكالىق كۇشەيتۋ جانە قايتا جاڭارتۋ جۇمىستارى ءجۇرىپ جاتىر — №16 ەمحانا مەن №4 جانە №7 قالالىق كلينيكالىق اۋرۋحانالاردا. ولاردى بيىلعى جىلدىڭ سوڭىنا دەيىن اياقتاۋ جوسپارلانعان.
كەلەسى جىلى تاعى 30 نىساننىڭ قۇرىلىسى باستالادى. ءقازىر ولاردىڭ جوبالىق-سمەتالىق قۇجاتتاماسى ازىرلەنىپ جاتىر.
2026 جىلعا ارنالعان جوسپار:
I توقساندا – «الاتاۋ» قالالىق ەمحاناسىن قايتا جاڭارتۋ، №2 پەرزەنتحانا مەن دۋمان شاعىناۋدانىنداعى ەمحانانىڭ قۇرىلىسى؛
II توقساندا – 6 ءىرى جوبانى باستاۋ، سونىڭ ىشىندە 300 توسەككە ارنالعان كوپبەيىندى اۋرۋحانا، بالالار جەدەل مەديسينالىق جاردەم ورتالىعى، №2 بالالار كلينيكالىق اۋرۋحاناسى، ونكوورتالىق جانە 200 توسەككە ارنالعان پەريناتالدىق ورتالىق؛
III توقساندا – قالعان 20 نىساننىڭ قۇرىلىسىن باستاۋ.
باعدارلاما ناتيجەسىندە الماتىدا زاماناۋي، ىڭعايلى ءارى تەڭگەرىمدى اۋرۋحانالار مەن ەمحانالار جۇيەسى قالىپتاسادى. بۇل ءوز كەزەگىندە مەديسينالىق كومەكتى بارلىق تۇرعىندارعا قولجەتىمدى ءارى جايلى ەتەدى.
«ءبىزدىڭ ماقسات – ءار تۇرعىن ءوز ءۇيىنىڭ جانىندا ساپالى مەديسينالىق كومەك الا الاتىنداي جاعداي جاساۋ. بارلىق جوبالار قولايلىلىق پەن زاماناۋي قىزمەت كورسەتۋگە باعىتتالعان»، - دەدى قالا اكىمىنىڭ ورىنباسارى بەيبىت شاحانوۆ.