الماتىداعى رەسپۋبليكا سارايىندا «مەيىرىمدى مۇحاممەد ﷺ» رۋحاني ءماۋلىت كەشى ءوتتى.
كەشكە قمدب ءتوراعاسى، باس ءمۇفتي ناۋرىزباي قاجى تاعان ۇلى قاتىسىپ، جينالعان حالىقتى قۇتتىقتاپ ارنايى بايانداما جاسادى. الماتى قالاسى اكىمىنىڭ قۇتتىقتاۋ حاتىن قالالىق ءدىن ىستەرى باسقارماسىنىڭ باسشىسى نۇرلان قيقىموۆ وقىپ بەردى. ءماۋلىت كەشىنە دەمەۋشىلىك جاساعان كاسىپكەر باحرەددين نۇعمان ۇلى جانە زيالى قاۋىم وكىلدەرى، اقساقالدار، مەشىت جاماعاتى مەن يمامدار قاتىستى، دەپ حابارلايدى Almaty-akshamy.kz.
اقىن، سازگەر جاكەن وماروۆ جىلداعى داستۇرمەن پايعامبارىمىزدىڭ ءومىربايانىن قازاق تىلىندە جىرلاپ، بيىل حيجرەتتىڭ 4-5 جىلدار وقيعاسىن باياندادى. بۇعان دەيىنگى ءماۋلىت مەرەكەلەرىندە پايعامبارىمىزدىڭ بالالىق شاعى، ودان كەيىن پايعامبارلىقتىڭ كەلۋى، ميعراجعا كوتەرىلۋى، ودان كەيىن حيجرەتتىڭ العاشقى جىلدارى مەن ءبادىر سوعىسى، ۋحۋد سوعىسى، حازرەتى حامزانىڭ شەيىت بولۋىنا توقتالعان بولاتىن.
مەرەكەلىك شارادا «ونەر قىراندارى» تەاترى ۇجىمى ساحنالىق قويىلىمدار قويدى. «حاس-ساق» ەتنو-فولكلورلىق ءانسابلى، قاناتبەك پولاتبەك جانە رينات تورە سىندى ەسترادا انشىلەرى ءيلاھي اندەر ورىنداپ، پايعامبارعا دەگەن ساعىنىشتارىن انمەن جەتكىزدى. سونىمەن قاتار پايعامبار سۇننەتىن ومىرىنە تەمىرقازىق ەتىپ ءوسىپ كەلە جاتقان جاس جەتكىنشەكتەر پايعامبارىمىز جايلى پوەزيا وقىدى. پايعامبار ومىرىنەن مول ماعلۇمات بەرەتىن كورمە ۇيىمداستىرىلىپ، كورەرمەن نازارىنا ۇسىنىلدى.
كەش سوڭىندا باس ءمۇفتي رۋحاني ءىس-شارانىڭ وتۋىنە دەمەۋشىلىك جاساعان بەلگىلى مەسەنات باحاريدين نۇعمانۇلىن «قازاقستان مۇسىلماندارى ءدىني باسقارماسىنا 30 جىل» مەرەكەلىك مەدالمەن ماراپاتتادى. سونداي-اق مەرەكەلىك باعدارلاماعا ۇلەس قوسقان بەلگىلى جىرشى جاكەن وماروۆقا، «ونەر قىراندارى» مەن «حاس-ساق» ۇجىمىنا العىس حاتىن تابىستاپ، ريزاشىلىق نيەتىن جەتكىزدى. سونىمەن قاتار بيلەتتەن تۇسكەن قاراجاتتان «ءماۋلىت سىيى» رەتىندە «نۇر-مۇباراك» ەگيپەت يسلام ۋنيۆەرسيتەتىنىڭ جاڭا عيماراتىنىڭ قۇرىلىسىنا 4 000 000 تەڭگەنىڭ سەرتيفيكاتى بەرىلدى. كومەككە مۇقتاج ازاماتتارعا قارجىلاي سەرتيفيكاتتار تابىستالدى. «ەل ۇلەسى - پاتەرگە» جوباسى بويىنشا رەسپۋبليكا بويىنشا 596-باسپانا، الماتى قالاسى بويىنشا 20-شى باسپانا كىلتىن تۇركسىب اۋداندىق «مەككە» مەشىتىنىڭ يمامى، 7 بالانىڭ اكەسى راحماتۋللا موللاقاعاناتۇلىنا تابىستادى. بۇدان بولەك، الماتى ورتالىق مەشىتىنىڭ جانىنان اشىلعان ونلاين-قۇران كۋرسىنىڭ بەلسەندى ۇستازىنا توسىن سىي رەتىندە ۇمرا قاجىلىعىنىڭ سەرتيفيكاتى بەرىلدى.