الماتىدا «ءماسليحاتتارعا 30 جىل: الماتى ءماسليحاتىنىڭ قالانىڭ الەۋمەتتىك-ەكونوميكالىق دامۋىنداعى ءرولى» اتتى عىلىمي-پراكتيكالىق كونفەرەنسيا ءوتتى.
ءىس-شاراعا الماتى اكىمى ەربولات دوسايەۆ، سەنات پەن الماتى ءماسليحاتىنىڭ دەپۋتاتتارى، ءماسليحاتتىڭ ەكس-حاتشىلارى، قوعام جانە ساياسي قايراتكەرلەر قاتىستى.
قالا باسشىسى وتكەن ءۇش ونجىلدىقتا ءماسليحاتتاردىڭ ءرولى ايتارلىقتاي ارتقانىن اتاپ ءوتتى. 2022 جىلى مەملەكەت باسشىسىنىڭ باستاماسىمەن ەڭ ماڭىزدى ساياسي رەفورمالاردىڭ ءبىرى جۇرگىزىلدى. رەسپۋبليكالىق رەفەرەندۋم قورىتىندىسى بويىنشا كونستيتۋسياعا تۇزەتۋلەر قابىلداندى، وندا بيلىكتىڭ بارلىق تارماقتارىنىڭ، ونىڭ ىشىندە جەرگىلىكتى وكىلەتتى ورگانداردىڭ قىزمەتىن جەتىلدىرۋ جونىندەگى ناقتى شارالار بەلگىلەندى.
2023 جىلى الماتى ءماسليحاتىنا سايلاۋ العاش رەت جاڭا ەرەجەلەر بويىنشا ءوتتى. دەپۋتاتتىق كورپۋس 67% - عا جاڭاردى جانە ارالاس قاعيدات بويىنشا 50% - پارتيالىق تىزىمدەر بويىنشا، 50% - ءوزىن-وزى ۇسىنۋشىلار بويىنشا قۇرىلدى.
«2022 جىلدان باستاپ ءبىز الماتىنىڭ بارلىق سالاداعى جۇيەلى دامۋىن انىقتايتىن 20-دان استام ستراتەگيالىق قۇجاتتاردى قابىلدادىق. بۇل قالا اۋماعىن اباتتاندىرۋ، جاسىل جەلەكتەردى كۇتىپ ۇستاۋ جانە قورعاۋ قاعيدالارى، «الماتى قالاسىنىڭ 2030 جىلعا دەيىنگى العاشقى مەديسينالىق-سانيتارلىق كومەكتىڭ ءبىرىڭعاي ستاندارتى» باعدارلاماسى، 2030 جىلعا دەيىنگى تۇرعىن ءۇيدى قايتا جاڭارتۋ باعدارلاماسى، قۇرىلىس سالۋ قاعيدالارى، قالاقۇرىلىسى رەگلامەنتى جانە باسقا دا قۇجاتتار. بۇل ماڭىزدى باستامالار-تۇراقتى كوميسسيالاردا جانە ءماسليحاتتىڭ دەپۋتاتتىق فراكسيالارىمەن بىرلەسكەن بەلسەندى جۇمىستىڭ ناتيجەسى»، - دەدى ەربولات دوسايەۆ.
قالا اكىمى الداعى جىلدارى الماتىنى جايلى قالالىق ورتاعا، الەمنىڭ تۇكپىر-تۇكپىرىنەن ينۆەستيسيالار مەن تالانتتار كەڭىنەن تارتىلاتىن ءارى دامۋدىڭ جوعارى دەڭگەيى بار ەڭ زاماناۋي مەگاپوليستەردىڭ بىرىنە اينالدىرۋ جانە تەرەڭ ترانسفورماسيالاۋ بويىنشا ماڭىزدى مىندەتتەر تۇرعانىن ايتتى.
ءسوزىنىڭ سوڭىندا الماتى اكىمى دەپۋتاتتاردى قۇتتىقتاپ، ولارعا العىس حاتتاردى تاپسىردى.
