قالامىزدا وسى كەزگە دەيىن زەينەپ احمەتوۆانىڭ اۋقىمدى كەزدەسۋى وتپەگەنىن كەشە ايتىپ وتكەنبىز.
كەشە «الاتاۋ» ءداستۇرلى ونەر تەاترىندا «كوپتەن كۇتكەن كەزدەسۋ» تاقىرىبىندا باۋىرجان مومىش ۇلىنىڭ كەلىنى، «شۋاقتى كۇندەر»، «بابالار اماناتى»، «كۇرەتامىر» كىتاپتارىنىڭ اۆتورى، جازۋشى، قوعام قايراتكەرى زەينەپ احمەتوۆامەن كەزدەسۋ ءوتتى، دەپ حابارلايدى Almaty-akshamy.kz
«وسىعان دەيىن وقۋ ورىندارىندا عانا ستۋدەنتتەرمەن جۇزدەسكەنى بولماسا، زەينەپ اپايىمىزدىڭ قالا جۇرتشىلىعىمەن كولەمدى كەزدەسۋ بولعان جوق. كىتاپتارىنىڭ دا تۇساۋكەسەرى وتپەگەن. باسقالار سياقتى مەرەيتويلارى دا تويلانباعان. سوندىقتان بۇل كەزدەسۋدى جۇرتتىڭ كۇتكەنى راس. ءبىزدىڭ باستامامىزعا قولداۋ ءبىلدىرىپ، تەاتردى تەگىن بەرگىزىپ، اپامىزدىڭ يىعىنا شاپان جاپقان قالا باسشىلىعىنداعى ازاماتتار – ارمان قىرىقبايۇلىنا، عاني مايلىبايەۆقا، ارمان قالىبەكوۆكە راقمەت ايتامىز»، دەدى كەزدەسۋگە مۇرىندىق بولعان «ادىرنا» ۇەب قوعامدىق قورىنىڭ جەتەكشىسى ارمان اۋباكىر.الماتى قالاسى اكىمدىگى مادەنيەت باسقارماسى مەن «ادىرنا» ۇلتتىق-ەتنوگرافيالىق بىرلەستىگى قوعامدىق قورى بىرلەسىپ ۇيىمداستىرعان شارادا زەينەپ احمەتوۆا ۇلتتىق تاربيە، رۋحاني قۇندىلىق، ءسالت-داستۇر، ەنە مەن كەلىن اراسىنداعى سىيلاستىق، بالا تاربيەسى تۋرالى ءوزىنىڭ ومىردەن تۇيگەن تاجىريبەسىنەن كەڭىنەن اڭگىمەلەدى.
سونداي-اق، قالام مەن قارۋدى قاتار ۇستاعان باتىر بابا باۋىرجان مومىش ۇلىنىڭ ءومىرى، ونىڭ وسيەتتەرى مەن ەستە قالارلىق قىزىقتى وقيعالارىمەن ءبولىستى.
«اتامنىڭ ارقاسىندا بۇگىنگى دارەجەگە جەتىپ، ەل ىشىندە ەركەلەپ ءجۇرمىن» دەگەن زەينەپ اپاي بارلىق ماقتاۋ-ماداق وزىنە ەمەس، باتىر اتامىزعا ايتىلدى دەپ قابىلدايتىنىن جەتكىزدى.
كەشتى «ادىرنا» ۇلتتىق ەتنوگرافيالىق بىرلەستىگىنىڭ جەتەكشىسى ارمان اۋباكىر تىزگىندەدى. شارا بارىسىندا ءداستۇرلى ءانشى ەرلان تولەۋتاي ءان شىرقادى.
«جازۋشىنىڭ ۇلاعاتقا تولى عيبراتتى اڭگىمەلەرىن تىڭداۋعا كەلگەن قالىڭ كورەرمەننىڭ اراسىندا كومپوزيتور قالدىبەك ءقۇرمانالى، قوعام قايراتكەرى، ابايتانۋشى ءادىل نەسىپبايەۆ، قازاقستاننىڭ ەڭبەك سىڭىرگەن قايراتكەرى اسىلى وسمان سىندى تانىمال ازاماتتار بولدى. ۇستىن-ۇستىنە سۇراق قويىپ بەلسەندىلىك تانىتقان كورەرمەن زەينەپ اپايدى جىبەرگىسى كەلمەدى، سول سەبەپتى كەزدەسۋ 3 ساعاتتان استام ۋاقىتقا سوزىلدى. كەش سوڭىندا زەينەپ احمەتوۆاعا سىي-سىياپات تابىستالدى. قۇتتىقتاۋ سوزىمەن ورتاعا شىققان الماتى قالاسى اكىمدىگى مادەنيەت باسقارماسىنىڭ مادەني كوپشىلىك ءىس-شارالار ءبولىمىنىڭ باسشىسى ارمان قالىبەكوۆ زەينەپ احمەتوۆاعا قامزول كيگىزىپ، يىعىنا ورامال جاپتى»، - دەدى «ادىرنا» ۇەب قوعامدىق قورىنىڭ جەتەكشىسى ارمان اۋباكىر.