الماتى قالاسىندا 1539 كارديوحيرۋرگيالىق وپەراسيا جاسالىپ، وعان 7،1 ملرد تەڭگە تولەنگەن
وڭتۇستىك استانادا 2022 جىلى مىندەتتى الەۋمەتتىك مەديسينالىق ساقتاندىرۋ ەسەبىنەن كورسەتىلگەن قىزمەتتەرگە 117،3 ملرد تەڭگە جۇمسالدى. بۇل تۋرالى بۇگىنگى بريفينگتە مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ حابارلادى.
ايتۋىنشا، جىل سايىن مەديسينالىق ساقتاندىرۋ ەسەبىنەن كارديوحيرۋرگيا، نەيروحيرۋرگيا، ۋرولوگيا، تراۆماتولوگيا، ونكولوگيا، حيرۋرگيا جانە تاعى دا باسقا پروفيلدەر بويىنشا جۇزدەگەن وپەراسيا جاسالىپ جاتىر. وسىنداي ءبىر عانا كۇردەلى وتانىڭ قۇنى ورتا ەسەپپەن بىرنەشە ميلليون تەڭگەگە جەتىپ جىعىلادى.
«مىسالى، 2022 جىلى الماتى قالاسىندا 1539 كارديوحيرۋرگيالىق وپەراسيا جاسالىپ، وعان 7،1 ملرد تەڭگە تولەنگەن. سونىمەن قاتار، 2،7 ملرد تەڭگەگە 534 نەيروحيرۋرگيالىق وتا جاسالعان. تاعى 2،2 ملرد تەڭگەنى مسق ءلور-پروفيلى بويىنشا جاسالعان 330 وپەراسياعا جۇمسادى»، - دەيدى تىلەۋحان ابىلدايەۆ.
بۇگىندە ارتروز، ارتريت سىندى بۋىن اۋرۋلارىنىڭ كوبەيۋىنە بايلانىستى تىزە، جامباس بۋىندارىن الماستىرۋشىلار سانى كۇرت ارتىپ وتىر. 2022 جىلى الماتىلىق تراۆماتولوگتار وسىنداي 4 270-تەن استام وپەراسيا جاسادى. وعان مسق 5،6 ملرد تەڭگە تولەدى، دەيدى فيليال باسشىسى.
سونىمەن قاتار جالپى قۇنى 476 ملن تەڭگەدەن اساتىن 64 ترانسپلانتاسيا جاسالعان، ونىڭ ىشىندە 27 بۇيرەك-باۋىر الماستىرۋ وپەراسياسى دا بار.
«ءبىر قاراعاندا، مۇنىڭ ءبارى جاي عانا سيفر بولىپ كورىنۋى مۇمكىن. شىن مانىندە، ساقتاندىرىلعان ازاماتتاردىڭ قالتاسىنان شىعاتىن شىعىن ەداۋىر قىسقارىپ، ولار وسىنشا قىزمەتتى تەگىن پايدالانىپ وتىر»، - دەپ قورىتتى تىلەۋحان ابىلدايەۆ.