ستوماتولوگيالىق كلينيكا كومەگىنە جۇگىنۋ ءۇشىن ەمحانادان جولداما الۋدىڭ قاجەتى جوق
2023 جىلى الماتى قالاسىندا مىندەتتى الەۋمەتتىك مەديسينالىق ساقتاندىرۋ پاكەتى ارقىلى كورسەتىلەتىن ستوماتولوگيالىق قىزمەتتەرگە 3،9 ملرد تەڭگە ءبولىندى. بۇل تۋرالى بۇگىنگى بريفينگتە مەديسينالىق ساقتاندىرۋ قورىنىڭ الماتى فيليالى ديرەكتورى تىلەۋحان ابىلدايەۆ حابارلادى.
تاعى ءبىر ايتا كەتەرلىگى، قور 2023 جىلدان باستاپ ستوماتولوگيالىق كلينيكالارمەن تىكەلەي كەلىسىمشارت بەكىتە باستادى.
«بۇرىن ستومقىزمەت كورسەتۋ تۋرالى كەلىسىمشارت ەمحانالار ارقىلى جاسالاتىن. ياعني، ستوماتولوگيالىق كلينيكالار ەمحانالارمەن سۋبمەردىگەرلىك كەلىسىمشارت ارقىلى جۇمىس ىستەيتىن جانە حالىققا كورسەتىلگەن ستومقىزمەت سانىن ەمحانالار قاداعالايتىن. ەمحانا جۇمىسىنىڭ كوپتىگىنەن بۇل پروسەستى باقىلاۋ قيىندىق تۋدىرىپ كەلدى. سالدارىنان ستوماتولوگيالىق كلينيكالار تاراپىنان كورسەتىلمەگەن قىزمەتتەردى «كورسەتتى» دەپ جازۋ فاكتىلەرى دە كەزدەستى. سوندىقتان قور وسىنداي ولقىلىقتاردىڭ الدىن الىپ، قىزمەت كولەمى مەن ساپاسىن باقىلاۋ ماقساتىندا كەلىسىمشارتتى تىكەلەي جاساۋ تۋرالى شەشىم قابىلدادى»، - دەدى تىلەۋحان ابىلدايەۆ.
ايتۋىنشا، ستوماتولوگيالىق كلينيكا كومەگىنە جۇگىنۋ ءۇشىن ەمحانادان جولداما الۋدىڭ قاجەتى جوق. الدىمەن قورمەن جۇمىس ىستەيتىن ءتىس كلينيكالارىن ناقتىلاپ الۋ قاجەت. ولاردىڭ تىزىمىمەن مسق fms.kz رەسمي سايتى ارقىلى تانىسۋعا بولادى. 2023 جىلى الماتىدا 70 مەديسينا ۇيىمى ستوماتولوگيالىق قىزمەت كورسەتەدى، ولاردىڭ اراسىندا ەمحانالار مەن جەكە مەنشىك كلينيكالار دا بار.
ەستەرىڭىزگە سالا كەتسەك، شۇعىل ستوماتولوگيالىق كومەك بالالار، جۇكتى ايەلدەر، ۇوس ارداگەرلەرى مەن زەينەتكەرلەر، مۇگەدەكتەر، بالالىق شاقتان مۇگەدەك جانە 1-توپ مۇگەدەگىن كۇتۋشىلەر، «التىن القا»، «كۇمىس القامەن» ماراپاتتالعان كوپ بالالى انالارعا، اتاۋلى الەۋمەتتىك كومەك الۋشىلارعا، جوسپارلى ستومكومەك 18 جاسقا دەيىنگى بالالار مەن جۇكتى ايەلدەرگە كورسەتىلەدى.