جۇمىسشى ماماندىقتارىنىڭ بەدەلىن ارتتىرۋ، جاستارعا كاسىبي باعدار بەرۋ، ەڭبەككە باۋلۋ جانە تاجىريبەلىك داعدىلاردى دامىتۋ ماقساتىندا ۇيىمداستىرىلعان «ماماندىق الەمى» اتتى كەزەكتى شەبەرلىك ساباق ءوتتى، - دەپ حابارلايدى Aqshamnews.kz.
شارا «جۇمىسشى ماماندىقتار جىلى» اياسىندا، الماتى قالاسى ىشكى ساياسات باسقارماسىنىڭ قوعامدىق دامۋ ورتالىعىنىڭ باستاماسىمەن قولعا الىنعان WORKSHOP «ەڭبەك پەن شەبەرلىك» جوباسىنىڭ جالعاسى رەتىندە وتكىزىلدى. بۇل جەرگە قالاداعى وقۋ ورىندارىنىڭ ستۋدەنتتەرى مەن وقۋشىلارىنىڭ قاتىسۋىمەن «الماتى جيھاز فابريكاسىندا» ۇيىمداستىرىلدى.
فابريكاداعى شەبەرلىك ساباعى تەوريادان گورى ءىس جۇزىندەگى ءبىلىم مەن تاجىريبەگە باسىمدىق بەردى. كاسىپورىننىڭ جەتەكشى ماماندارى جاستارعا اعاش وڭدەۋ، بولشەكتەردى ءدال ولشەۋ، بۇيىم قۇراستىرۋ جانە ساپانى باقىلاۋ سەكىلدى ناقتى داعدىلاردى كورسەتتى. قاتىسۋشىلار ءوز قولىمەن شاعىن بۇيىمدار جاساپ، ءوز ەڭبەگىنىڭ ناتيجەسىن كورۋدىڭ قۋانىشىن سەزىندى. كاسىبي مامانداردىڭ قاسىندا ءجۇرىپ، قۇرال-جابدىقتارمەن جۇمىس ىستەۋدى ۇيرەنۋ، ءار پروسەستىڭ ءمانىن ءتۇسىنۋ — جاستار ءۇشىن جاڭا تاجىريبە عانا ەمەس، ءوز قابىلەتىن تانىپ، بولاشاق ماماندىعىنا قىزىعۋشىلىق وياتۋدىڭ ءتيىمدى جولى بولدى.
ءىس-شارا بارىسىندا قاتىسۋشىلار تەك تىڭداپ قانا قويماي، سۇراق قويىپ، پىكىر الماسىپ، ءوز ويلارىن ورتاعا سالدى. بۇل – ادەتتەگى ءدارىس ەمەس، ناقتى ومىرمەن ۇشتاسقان تاجىريبەلىك ديالوگ الاڭى بولدى. كوپتەگەن وقۋشى ءوز بولاشاعى تۋرالى ويلانىپ، ەڭبەك نارىعىنداعى سۇرانىسقا يە سالالارعا قىزىعۋشىلىق تانىتتى. وسىنداي فورماتتاعى ساباقتار جاستاردىڭ كاسىبي باعدار الۋىنا جانە ءوز قابىلەتىن تانۋعا ناقتى مۇمكىندىك بەرەدى.
جوبا ەڭبەك ادامىنىڭ مارتەبەسىن ارتتىرۋمەن قاتار، جاس بۋىننىڭ بويىنا تاباندىلىق، توزىمدىلىك جانە ەڭبەكقورلىق سياقتى قاسيەتتەردى سىڭىرۋگە باعىتتالعان. بۇل – ەلدىڭ وندىرىستىك الەۋەتىن ارتتىرۋعا، كادرلىق تاپشىلىقتىڭ الدىن الۋعا جانە «ەڭبەك ادامىن ۇلگى ەتۋ» يدەياسىن قوعام ساناسىنا سىڭىرۋگە ارنالعان كەشەندى قادام.