الماتى قالاسىنىڭ سوتى تەررورلىق اكت تۋرالى جالعان حابارلاما جاساعان ەر ادامعا ۇكىم شىعاردى.
وقيعا وتكەن جىلدىڭ جەلتوقسان ايىندا بولعان، دەپ حابارلايدى aqshamnews.kz.
Polisia.kzء-تىڭ حابارلاۋىنشا، قۇقىق بۇزۋشى ماس كۇيىندە جەدەل قىزمەتكە قوڭىراۋ شالىپ، قالاداعى ساۋدا ورتالىقتارىنىڭ بىرىندە جارىلىس بولاتىنى تۋرالى حابار بەرگەن. بۇل اقپارات تۇسكەن بويدا قۇقىق قورعاۋ ورگاندارى شۇعىل ارەكەتكە كىرىسىپ، عيماراتتان ادامداردى ەۆاكۋاسيالاپ، نىساندى تولىق تەكسەردى. تەكسەرۋ بارىسىندا قوڭىراۋدىڭ جالعان ەكەنى انىقتالدى. وسىلايشا، كۇدىكتىنىڭ ارەكەتى توتەنشە جاعدايلار قىزمەتىنىڭ جۇمىسىنا كەدەرگى كەلتىرىپ، ماتەريالدىق شىعىنعا سەبەپ بولدى. سوتتىڭ شەشىمىمەن ول كىنالى دەپ تانىلىپ، ءبىر جىلعا باس بوستاندىعىنان ايىرىلدى.
- مۇنداي جالعان حابارلامالار توتەنشە قىزمەتتەردىڭ قۇندى رەسۋرستارىن ىسىراپ ەتىپ، ولاردىڭ نەگىزگى مىندەتتەرىن اتقارۋىنا كەدەرگى جاسايدى. سونداي-اق تۇرعىندار اراسىندا نەگىزسىز ۇرەي تۋعىزادى. تەررورلىق اكت تۋرالى جالعان اقپارات تاراتۋدىڭ قىلمىستىق جاۋاپكەرشىلىككە اكەلەتىنىن ەسكەرتەمىز. بارشا ازاماتتى جاۋاپكەرشىلىككە شاقىرامىز جانە مۇنداي ارەكەتتەردىڭ جازاسىز قالمايتىنىن ەستەن شىعارماۋعا كەڭەس بەرەمىز، - دەدى الماتى قالالىق پد ەكسترەميزمگە قارسى كۇرەس باسقارماسىنىڭ باستىعى اسحات داۋلەتياروۆ.
قۇقىق قورعاۋ ورگاندارى قوعامنىڭ قاۋىپسىزدىگىن قامتاماسىز ەتۋ ماقساتىندا وسىنداي ارەكەتتەرگە قاتاڭ تۇردە توسقاۋىل قويىلاتىنىن اتاپ ءوتتى.