ىرىكتەۋدەن وتكەن كۋرسانتتار قازاقستاننىڭ قارۋلى كۇشتەرىنىڭ نامىسىن حالىقارالىق ارەنادا قورعايدى
تمد ەلدەرىنىڭ جوعارى اسكەري وقۋ ورىندارىنىڭ كۋرسانتتارى اراسىندا II اسكەري-سپورتتىق ويىندارعا ىرىكتەۋ بويىنشا شارالارى قۇرلىق اسكەرلەرىنىڭ اسكەري ينستيتۋتىندا ۇيىمداستىرىلدى، دەپ حابارلايدى Almaty-akshamy.kz.
وعان قۇرلىق اسكەرلەرى اسكەري ينستيتۋتىنىڭ، راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ، ۇقك شەكارا قىزمەتى اكادەمياسىنىڭ 120 كۋرسانتى قاتىسادى.
كۋرسانتتارعا ارناپ قورعانىس مينيسترلىگى سپورت كوميتەتىنىڭ ءتوراعاسى سيدنەيدە وتكەن وليمپيادا چەمپيونى ولگا شيشيگينا، جوعارى اسكەري وقۋ ورىندارىنىڭ باسشىلارى ءسوز سويلەدى.
– ىرىكتەۋ جارىستارى ەلىمىزدىڭ قارۋلى كۇشتەرىنىڭ قۇراما كومانداسىن قالىپتاستىرۋعا باعىتتالعان. ىرىكتەۋدە جۇگىرۋ، بەلتەمىرگە تارتىلۋ، ارميالىق قويان-قولتىق ۇرىس، اسكەريلەندىرىلگەن كروسس، شاعىن فۋتبول جانە شتاتتىق قارۋدان اتۋ بويىنشا جارىستاردىڭ ناتيجەلەرىنە بايلانىستى بولادى، – دەدى قورعانىس مينيسترلىگى ورتالىق سپورت كلۋبىنىڭ سپورتتىق ءىس-شارالاردى ۇيىمداستىرۋ ءبولىمىنىڭ باستىعى، مايور ەربول يگيسينوۆ.
ىرىكتەۋدەن وتكەن كۋرسانتتار قازاقستاننىڭ قارۋلى كۇشتەرىنىڭ نامىسىن حالىقارالىق ارەنادا قورعاۋعا مۇمكىندىك الادى. تمد ەلدەرىنىڭ جوعارى اسكەري وقۋ ورىندارىنىڭ كۋرسانتتارى اراسىنداعى II اسكەري-سپورتتىق ويىندار 2023 جىلعى 5-9 ماۋسىم ارالىعىندا وزبەكستان استاناسى تاشكەنتتە وتەتىنىن ايتا كەتكەن ءجون.