بۇگىن قازاقستاننىڭ باتىسىندا، سولتۇستىك-باتىسىندا، ورتالىعىندا، وڭتۇستىگى مەن وڭتۇستىك-شىعىسىندا كۇن كۇرت بۇزىلادى. سينوپتيكتەر بۇل وڭىرلەردە قاتتى جاڭبىر جاۋىپ، وزەندەردەگى سۋدىڭ دەڭگەيى كۇرت كوتەرىلەتىنىن ەسكەرتتى. بۇل تۋرالى Aqshamnews.kz سايتى حابارلايدى. «قازگيدرومەت» ماماندارى سۋ تاسقىنى ءقاۋپىنىڭ كۇشەيۋىنە قاردىڭ ەرۋى مەن جاۋىن-شاشىننىڭ كوپ مولشەردە ءتۇسۋى سەبەپ بولىپ وتىرعانىن ايتادى.
14 وبلىستا داۋىلدى ەسكەرتۋ جاريالاندى
مەتەورولوگتاردىڭ دەرەگىنشە، بۇگىنگى كۇنى ەلدىڭ ءبىرقاتار وڭىرلەرىندە اۋا رايىنىڭ قولايسىزدىعىنا بايلانىستى داۋىلدى ەسكەرتۋ جاريالاندى. بۇل قاتاردا اتىراۋ، جامبىل، قىزىلوردا، ماڭعىستاۋ، باتىس قازاقستان، تۇركىستان، سولتۇستىك قازاقستان، قاراعاندى، ۇلىتاۋ، اقتوبە، قوستاناي، جەتىسۋ جانە اقمولا وبلىستارى بار. نەگىزگى ءقاۋىپ فاكتورلارى – تۇمان، نايزاعاي جانە قاتتى جاڭبىر.
توتەنشە جاعدايلار مينيسترلىگى مەن جەرگىلىكتى اكىمدىكتەر تۇرعىنداردى قاۋىپسىزدىك شارالارىن قاتاڭ ساقتاۋ قاجەتتىگىن ەسكەرتەدى. اسىرەسە، سۋ تاسقىنى ءقاۋپى بار ەلدى مەكەندەردە ەۆاكۋاسيا جوسپارى ازىرلەنىپ، بوگەتتەر مەن سۋ قويمالارىنىڭ جاعدايى قاتاڭ باقىلاۋعا الىنعان.
استانا، الماتى جانە شىمكەنت قالالارىنداعى اۋا رايى
استانادا بۇگىن كۇندىز +17–19 °C، تۇندە +6–8 °C بولادى. كەي ۋاقىتتا جاڭبىر جاۋادى. جەلدىڭ جىلدامدىعى 7–12 م/س شاماسىندا.
الماتىدا اۋا تەمپەراتۋراسى كۇندىز +21–23 °C، تۇندە +11–13 °C شاماسىندا. تاڭەرتەڭ جانە كۇندىز نايزاعايلى جاڭبىر جاۋادى، تۇندە جاۋىن-شاشىن بولمايدى. جەل 5–10 م/س، نايزاعاي كەزىندە 15–20 م/س دەيىن كۇشەيۋى مۇمكىن.
شىمكەنتتە اۋا رايى ءبىرشاما جايلىراق: كۇندىز +25–27 °C، تۇندە +11–13 °C. جاۋىن-شاشىن كۇتىلمەيدى. الايدا جەل كۇشەيىپ، 23 م/س دەيىن جەتۋى ىقتيمال.