رومان ۇلتتىق ءداستۇردى ساقتاۋ سياقتى قۇندىلىقتار ارقىلى بۇكىلالەمدىك سۇراقتارعا جاۋاپ ىزدەيدى
بۇگىن ۇلتتىق كىتاپحانادا Mecenat.kz ادەبي بايقاۋىنىڭ تۇڭعىش جەڭىمپازى، جازۋشى شارحان قازىعۇلدىڭ «ARNA-B» باسپاسىنىڭ قولدۋىمەن جارىق كورگەن «كۇلپەت» رومانىنىڭ تۇساۋكەسەرى ءوتتى، دەپ حابارلايدى Almaty-akshamy.kz.
«كۇلپەت» رومانى قازاقستاننىڭ سوسياليزم داۋىرىندەگى كەزەڭىنەن باستاپ قازىرگى كۇنگە دەيىنگى تاريحىن باستى كەيىپكەر ءابۋجان رايىسوۆتىڭ ءومىرى مەن تاعدىرى ارقىلى سۋرەتتەيدى. رومان تۋعان جەرگە دەگەن ماحاببات پەن شىنايى پاتريوتيزم، قازاق ايەلىنىڭ ادالدىعى، ۇلتتىق ءداستۇردى ساقتاۋ سياقتى قۇندىلىقتار ارقىلى بۇكىلالەمدىك سۇراقتارعا جاۋاپ ىزدەيدى.
ءىس-شارانى «ازيانىڭ شىعارماشىلىق بوگەمياسى» بىرلەستىگىنىڭ جەتەكشىلەرى گۇلنارا جاندىبايەۆ جانە الما نۋتۋشوۆا قۇتتىقتاۋ سوزبەن اشتى.
شارادا مەملەكەت جانە قوعام قايراتكەرى، «قۇرمەت» جانە «پاراسات» وردەندەرىنىڭ يەگەرى بەردىبەك ساپاربايەۆ، قازاقستاننىڭ ەڭبەك سىڭىرگەن قايراتكەرى، جازۋشى، دراماتۋرگ سماعۇل ەلۋباي، قازاقستاننىڭ حالىق ءارتىسى، تەاتر جانە كينو اكتەرى دوسحان جولجاقسىنوۆ «كۇلپەت» رومانى جايلى ءوز پىكىرلەرىمەن ءبولىسىپ، كىتاپتىڭ تۇساۋكەسەر ءراسىمىن جاسادى.
شىعارماشىلىق كەزدەسۋدە «كۇلپەت» رومانىنىڭ اۆتورى شارحان قازىعۇل، Mecenat.kz ادەبي بايقاۋىنىڭ قۇرىلتايشىسى ەرلان اسقاربەكوۆ، «Kitapfest» كىتاپ فەستيۆالىن ۇيىمداستىرۋشى بەكنۇر قيسىقوۆتار ءسوز سويلەپ، الداعى جوسپارلارمەن ءبولىسىپ، وسى جوبالاردى ۇيىمداستىرۋدا قولداۋ كورسەتكەن ادەبيەت جاناشىرلارىنا العىستارىن جەتكىزدى.
قازاقستاننىڭ ەڭبەك سىڭىرگەن قايراتكەرى، ءداستۇرلى ءانشى ايگۇل قوسانوۆا جانە قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى شارحان قازىعۇلدى ارنايى قۇتتىقتاي كەلىپ، اسەم انمەن شاشۋ شاشتى.
شارا سوڭىندا ۇيىمداستىرۋشىلار قازاقستان رەسپۋبليكاسىنىڭ ۇلتتىق كىتاپحاناسىنا ريزاشىلىقتارىن ءبىلدىرىپ، العىس حات تابىستادى.