فورۋم جۇمىسىنا 170-تەن اسا دارىگەر قاتىستى
23-24 اقپان كۇندەرى سيرەك كەزدەسەتىن اۋرۋلار كۇنى اياسىندا «ورفاندىق اۋرۋلاردى دياگنوستيكالاۋ مەن ەمدەۋدىڭ زاماناۋي تاسىلدەرى» اتتى ونلاين-فورۋم ءوتتى، دەپ حابارلايدى Almaty-akshamy.kz.
حالىقارالىق فورۋمنىڭ باستى ماقساتى – ورفاندىق اۋرۋلاردى ەرتە دياگنوستيكالاۋ، الدىن الۋ جانە ەمدەۋ سالاسىندا تاجىريبە الماسۋدى دامىتۋ، دارىگەرلەر، پاسيەنتتەر قاۋىمداستىعى جانە حالىق اراسىندا سيرەك كەزدەسەتىن اۋرۋلار تۋرالى حاباردارلىقتى ارتتىرۋ.
ءىس-شارانىڭ ۇيىمداستىرۋشىلارى: ورفاندىق اۋرۋلارمەن اۋىراتىن ناۋقاستارعا كومەك كورسەتۋ قاۋىمداستىعى مەن پەدياتريا جانە بالالار حيرۋرگياسى عىلىمي ورتالىعى.
فورۋم جۇمىسىنا 170-تەن اسا دارىگەرلەر: قازاقستاننىڭ بارلىق ايماقتارىنان جانە شەتەلدىڭ بىلىكتى ماماندارى، قازاقستان رەسپۋبليكاسى دەنساۋلىق ساقتاۋ مينيسترلىگى مەن «قازاقستان حالقىنا» قوعامدىق قورىنىڭ وكىلدەرى، سيرەك اۋرۋلار جونىندەگى ۇيلەستىرۋشىلەر، عىلىمي ينستيتۋتتاردىڭ جەتەكشى ماماندارى مەن باسشىلارى، سونداي-اق مەديسينالىق جوو پروفەسسورلارى قاتىستى.
حالىقارالىق كونفەرەنسيا قازاقستان رەسپۋبليكاسىنىڭ دەنساۋلىق ساقتاۋ ۆيسە-مينيسترى ۆياچەسلاۆ دۋدنيكتىڭ، «قازاقستان حالقىنا» قق باسقارۋشى ديرەكتورى سوفيا ايساعالييەۆانىڭ، پەدياتريا جانە بالالار حيرۋرگياسى عىلىمي ورتالىعىنىڭ باسقارما ءتوراعاسى اباي قۇسايىنوۆتىڭ جانە ورفاندىق اۋرۋلارمەن اۋىراتىن ناۋقاستارعا كومەك كورسەتۋ قاۋىمداستىعىنىڭ ءتورايىمى باقىت بايعالييەۆانىڭ العى سوزىمەن اشىلدى.
دەنساۋلىق ساقتاۋ ۆيسە-مينيسترى ۆياچەسلاۆ دۋدنيك ءوزىنىڭ العى سوزىندە دەنساۋلىق ساقتاۋ مينيسترلىگىنىڭ ورفاندىق اۋرۋلارمەن اۋىراتىن ناۋقاس بالالارعا مەديسينالىق كومەك كورسەتۋ ساپاسىن ارتتىرۋعا باعىتتالعان ءبىرقاتار ماڭىزدى باستامالارىن اتاپ ءوتتى.
«پەدياتريا جانە بالالار حيرۋرگياسى عىلىمي ورتالىعى 2017 جىلى دەنساۋلىق ساقتاۋ ءمينيسترىنىڭ بۇيرىعىمەن سيرەك كەزدەسەتىن اۋرۋلاردى ۇيلەستىرۋ ورتالىعى بولىپ بەلگىلەندى. ءبىزدىڭ ورتالىقتا بارلىق ونكولوگيالىق جانە گەماتولوگيالىق اۋرۋلار، مۋكوۆيسيدوز، گوشە اۋرۋى، قان ۇيۋىنىڭ بۇزىلىستارى، بىرىنشىلىك يممۋنتاپشىلىعى، مۋكوپوليساحاريدوز سياقتى سيرەك كەزدەسەتىن اۋرۋلارى بار ناۋقاستارعا دياگنوستيكالاۋ، ەمدەۋ، ديناميكالىق باقىلاۋ جۇرگىزىلەدى. ەلىمىزدىڭ بارلىق ايماعىندا رەسپۋبليكالىق ۇيلەستىرۋشىلەر قىزمەت جاسايدى. سيرەك اۋرۋلارعا شالدىققان ناۋقاستاردى دياگنوستيكالاۋ جانە ەمدەۋ بويىنشا وڭىرلەرگە نەگىزگى ۇيىمداستىرۋشىلىق، ادىستەمەلىك، كونسۋلتاتيۆتىك جانە پراكتيكالىق كومەك كورسەتەتىن ءبىزدىڭ ورتالىقتىڭ دارىگەرلەرى. 2017 جىلى پەدياتريا ورتالىعىندا قوعامدىق كەڭەس قۇرىلىپ، ونىڭ قۇرامىنا كوپتەگەن قوعامدىق جانە پاسيەنتتىك ۇيىمداردىڭ وكىلدەرى كىردى. وسى قوعامدىق قورداعى جۇمىس بارلىق ۇيىم وكىلدەرىن قاۋىمداستىققا بىرىكتىرۋگە سەبەپ بولدى. 2022 جىلدان باستاپ پەدياتريا ورتالىعى «قازاقستان حالقىنا» قوعامدىق قورىمەن بىرلەسىپ سيرەك كەزدەسەتىن اۋرۋلارعا شالدىققان بالالارعا ءتيىمدى، قىمبات دارىلەرمەن قامتاماسىز ەتۋ بويىنشا بىرلەسكەن جۇمىستى باستادى»، دەدى العى سوزىندە پەدياتريا جانە بالالار حيرۋرگياسى عىلىمي ورتالىعىنىڭ باسقارما ءتوراعاسى اباي قۇسايىنوۆ.
بۇكىل الەمدە سيرەك كەزدەسەتىن اۋرۋلارى بار بالالاردى دياگنوستيكالاۋ، ەمدەۋ جانە وڭالتۋ ماسەلەلەرىنە كوپ كوڭىل بولىنەدى. بۇگىنگى تاڭدا سيرەك كەزدەسەتىن اۋرۋلاردىڭ 7 مىڭنان استام ءتۇرى بەلگىلى. ءاربىر ەل ورفاندىق اۋرۋعا قاتىستى ءوز كريتەرييلەرىن بەلگىلەيدى جانە ءار ەل سيرەك كەزدەسەتىن اۋرۋلارمەن اۋىراتىن ناۋقاستارعا مەديسينالىق كومەك كورسەتۋ جولىن جانە كۇتىم كورسەتۋدىڭ وزىندىك ءادىسىن انىقتايدى. بۇكىل الەمدە قوعامدىق قورلار مەن پاسيەنتتىك ۇيىمدار ورفانەتيكا سالاسىن دامىتۋدىڭ نەگىزگى قوزعاۋشى كۇشى جانە باستاماشىسى بولىپ تابىلادى. بۇل فورۋم دا ورفاندىق اۋرۋلارمەن اۋىراتىن ناۋقاستارعا كومەك كورسەتۋ قاۋىمداستىعىنىڭ باستاماسىمەن ۇيىمداستىرىلدى.
بۇگىنگى تاڭدا ورفاندىق اۋرۋلاردىڭ رەسمي تىزىمىندە 66 نوزولوگيا بار. ورفاندىق دەپ 100 000 حالىققا شاققاندا تارالۋى 50 جاعدايدان از بولسا اۋرۋ رەتىندە سانالادى. 2023 جىلعى 1 قاڭتارداعى «ديسپانسەرلىك ناۋقاستىڭ ەلەكتروندى تىركەلىمى» اقپاراتتىق جۇيەسىنىڭ مالىمەتى بويىنشا 13 مىڭنان استام بالا ءتۇرلى بەيىندەگى مامانداردىڭ ديناميكالىق باقىلاۋىندا تۇر.
ەكى كۇنگە جالعاسقان فورۋمدا ورفاندىق اۋرۋلاردىڭ ءارتۇرلى ماسەلەلەرى بويىنشا 29 بايانداما تىڭدالدى. ونىڭ ىشىندە قازاقستان، رەسەي، تۇركيا جانە ۇلىبريتانيا عىلىمي ورتالىقتارى مەن ۋنيۆەرسيتەتتەرىنىڭ، سونىمەن قاتار ءارتۇرلى مەديسينالىق ۇيىم ماماندارىنىڭ باياندامالارى بولدى. فورۋمعا قاتىسۋشىلارعا سيرەك كەزدەسەتىن اۋرۋلارى بار بالالارعا مەديسينالىق كومەك كورسەتۋدى ۇيىمداستىرۋ، سونداي-اق دياگنوستيكانىڭ ماسەلەلەرى مەن باعىتتارى، يننوۆاسيالىق تەراپيانىڭ پرينسيپتەرى مەن ادىستەرى، سيرەك اۋرۋلارعا شالدىققان بالالاردى وڭالتۋ تۋرالى اقپاراتتار بەرىلدى. سونداي-اق، باسقوسۋدا كەيبىر اۋرۋلاردىڭ گەنەتيكالىق دياگنوستيكاسىنىڭ پەرسپەكتيۆالارى مەن پروبلەمالارى تالقىلاندى.
مازمۇندى باياندامالاردىڭ ارقاسىندا جانە ءاربىر فورۋمعا قاتىسۋشىنىڭ جەكە قىزىعۋشىلىعىنىڭ ارقاسىندا مەديسينا قاۋىمىنىڭ ەرەكشە بالالار تۋرالى حاباردارلىعى ارتتى، بۇل ءوز كەزەگىندە سيرەك كەزدەسەتىن اۋرۋلاردى ەرتە دياگنوستيكالاۋ مەن دەر كەزىندە ەمدەۋدى جاقسارتۋعا ىقپال ەتەرى ءسوزسىز.