قازاقستاندا تۇنگى كوڭىل كوتەرۋ ورىندارىندا سپيرتتىك ىشىمدىكتەردى ساتۋ ۋاقىتىن شەكتەۋ جانە ولاردىڭ ساۋداسىنا قوسىمشا باقىلاۋ شارالارىن ەنگىزۋ ۇسىنىلدى، دەپ حابارلايدى Aqshamnews.kz ءتىلشىسى ءىىم باسشىسى ەرجان سادەنوۆتىڭ باستاماسىنا سىلتەمە جاساپ.
ءمينيستردىڭ ايتۋىنشا، جىل سايىن ماس كۇيدەگى ادامداردىڭ قاتىسۋىمەن 10 مىڭعا جۋىق قىلمىس جاسالادى.
"ءبىز پروفيلاكتيكالىق شارالار قابىلداپ ءجۇرمىز: ماس كۇيىندە ىشىمدىك ءىشۋ فاكتىلەرىنىڭ جولىن كەسەمىز، قوعامدىق ورىنداردان ماس ادامداردى وقشاۋلايمىز، ەسەپتەگى ازاماتتارعا الكوگول تۇتىنۋعا تىيىم سالامىز. الايدا بۇل سالدارمەن كۇرەس قانا"، - دەدى سادەنوۆ دۇيسەنبى كۇنى ىىم-دە وتكەن ءماجىلىستىڭ كوشپەلى ۇكىمەتتىك ساعاتىندا.
ول پوليسەيلاردىڭ وكىلەتتىگى كوبىنە ماجبۇرلەۋ شارالارىمەن شەكتەلەتىنىن اتاپ ءوتتى.
"پايدا ءۇشىن كەي كاسىپكەرلەر سپيرتتىك ىشىمدىكتەردى ساتۋ بويىنشا جاس شەكتەۋلەرىن جانە ۋاقىت رەجيمىن بۇزادى، كافە-بار بۇركەنشىگىمەن تاۋلىك بويى ساۋدالايدى، ونلاين جەتكىزۋدى بەلسەندى قولدانادى. بۇل رەتتە ليسەنزيادان ايىرۋ شاراسى ءتيىمسىز: كەلەسى كۇنى باسقا تۇلعالارعا راسىمدەپ الادى"، - دەپ ءتۇسىندىردى مينيستر.
ءىىم ازىرلەگەن ۇسىنىستار ۆەدومستۆوارالىق كوميسسيا وتىرىسىندا قارالعان. اتاپ ايتقاندا، مىناداي شارالار ۇسىنىلادى:
- الكوگولدى بولشەك ساۋدانى تەك مامانداندىرىلعان دۇكەندەردە الكوماركەتتەردە عانا رۇقسات ەتۋ؛
- ليسەنزيا بەرۋ تالاپتارىن قاتاڭداتۋ، سونىڭ ىشىندە ولاردى ليميتتەۋ؛
- الكوگولدىڭ ونلاين-ساۋداسىنا تولىقتاي تىيىم سالۋ.
بۇعان قوسا، ۆەدومستۆو ويىن-ساۋىق ورىندارىندا سپيرتتىك ىشىمدىكتەردى ساتۋ ۋاقىتىن شەكتەۋدى قاجەت دەپ سانايدى.
"مۇنداي ورىنداردا ماس كۇيىندە 1 400-دەن استام قىلمىس جاسالدى، ونىڭ ىشىندە ءۇش كىسى ءولىمى بار. دەگەنمەن، بۇگىن كەي مەملەكەتتىك ورگاندار بۇل تاسىلدەردى قولدامايدى. مەنىڭشە، ەڭ الدىمەن ازاماتتارىمىزدىڭ ءومىرى مەن دەنساۋلىعىن ساقتاۋدىڭ مۇددەسى باسىم بولۋعا ءتيىس"، - دەپ تۇيىندەدى ەرجان سادەنوۆ.