الماتىدا كوروناۆيرۋس جۇقتىرعان 5095 ناۋقاس ەم قابىلداپ جاتىر. بۇل تۋرالى قالالىق قوعامدىق دەنساۋلىق باسقارماسىنان ءمالىم ەتتى، دەپ حابارلايدى almaty-akshamy.kz
31 تامىز كۇنگى اقپارات بويىنشا، ءبىر تاۋلىكتە قالادا 1 259 ادام كوروناۆيرۋس جۇقتىرعان. مۇنىڭ ىشىندە سيمپتومدى، جەڭىل جانە ورتاشا دەڭگەيدەگى بەلگىلەرمەن – 1207، سيمپتومسىز – 52 ناۋقاس تىركەلدى. بارلىق ەمدەلىپ شىققاندار – 846، كەلىپ تۇسكەنى – 425.
«ينفەكسيالىق ستاسيونارلاردا 5 095 ادام بار (توسەك-ورىننىڭ جالپى سانى –8 910 )، ونىڭ ىشىندە 125 بالا ەمدەلۋدە»، - دەپ ناقتىلادى قوعامدىق دەنساۋلىق باسقارماسىنىڭ باسپا ءسوز قىزمەتىنەن.
سونداي-اق رەانيماسيا جانە قارقىندى تەراپيا بولىمىندە 414 ادام جاتىر. ال 69 ناۋقاس جاساندى تىنىس الۋ اپپاراتىنا قوسىلعان. ءينۆازيۆتى ەمەس جاساندى تىنىس الۋ اپپاراتىندا 174 ادام ەم قابىلداۋدى جالعاستىرۋدا. High flow-دا 182 اپپارات جۇمىس ىستەيدى.
مەديسينالىق-سانيتارلىق العاشقى كومەك ءموبيلدى بريگادالارىنىڭ جانە تەلەمەديسينا ورتالىعىنىڭ امبۋلاتوريالىق باقىلاۋىندا 10 307 پاسيەنت بار. ونىڭ ىشىندە ىندەت بەلگىلەرى بار، ورتاشا اۋىر جاعدايدا – 9 950 ناۋقاس. 357 ادامدا كوروناۆيرۋس بەلگىلەرى جوق.