ەلىمىزدىڭ ءبىلىم جانە عىلىم ءمينيسترى ءبىلىم كۇنىمەن قۇتتىقتاۋىن جەتكىزدى
ق ر ءبىلىم جانە عىلىم ءمينيسترى اسحات ايماعامبەتوۆ قازاقستاندىقتاردى ءبىلىم كۇنىمەن قۇتتىقتادى، دەپ حابارلايدى Almaty-akshamy.kz.
قۇرمەتتى ۇستازدار، وقىتۋشىلار، وقۋشىلار، ستۋدەنتتەر جانە اتا-انالار!
سىزدەردى 1 قىركۇيەك — جاڭا وقۋ جىلىنىڭ باستالۋىمەن قۇتتىقتايمىن! ءبىلىم بەرۋ ۇيىمدارىندا وقۋ جىلى قاتاڭ سانيتارلىق تالاپتاردى ساقتاي وتىرىپ، ءداستۇرلى فورماتتا باستالادى.
بالالار ءوز مەكتەپتەرىن، دوستارى مەن سىنىپتاستارىن، ال مۇعالىمدەرىمىز وقۋشىلارىن ساعىندى. بارلىعى مەكتەپتەردىڭ اشىلۋىن اسىعا كۇتتى.
الەمدىك پاندەميا ءبىلىم بەرۋ ۇردىسىندەگى ءمۇعالىمنىڭ باعا جەتپەس ءرولىن ايقىنداي ءتۇستى. اتاپ ايتساق، ءمۇعالىمنىڭ كاسىبيلىگى، تاجىريبەسى، بالاعا دەگەن سۇيىسپەنشىلىگى مەن وقۋشىنىڭ ومىرىندەگى اتقاراتىن ءرولى ايقىندالدى. البەتتە، مۇعالىمدەر گادجەت ەكراندارى ارقىلى ەمەس، بالالارمەن تىكەلەي بايلانىستا بولا وتىرىپ بەرەتىن ءبىلىمدى زاماناۋي تەحنولوگيالارمەن سالىستىرۋ قيىن.
1 قىركۇيەك — ءبىرىنشى سىنىپ وقۋشىلارى ءۇشىن ەرەكشە مەرەكە. بيىل 394 مىڭعا جۋىق بالا مەكتەپ تابالدىرىعىن العاش رەت اتتايدى. وسى سالتاناتتى كۇنى «الىپپە» مەن «بۋكۆار» وقۋلىقتارىن قولدارىنا الاتىن ءبىرىنشى سىنىپ وقۋشىلارىن قۇتتىقتاعىم كەلەدى. بۇلدىرشىندەرىمىزگە مىقتى دەنساۋلىق تىلەپ، اشىق جانە ءبىلىمقۇمار بولۋعا شاقىرامىن.
جاڭا وقۋ جىلى ءاربىر وقۋشى، ستۋدەنت، ءمۇعالىم جانە وقىتۋشى، جالپى، ءبىلىم بەرۋ سالاسىنا قاتىسى بار ءاربىر ادام ءۇشىن قىزىقتى ءارى پايدالى بولۋىن تىلەيمىن.
قۇرمەتتى ارىپتەستەر! كوپتەن كۇتكەن ءداستۇرلى فورماتقا ورالىپ، مەكتەپ قابىرعاسىندا بالالاردىڭ جارقىن كۇلكىلەرىن ەستۋ سىزدەردى قۋانىشقا بولەيتىنىن بىلەمىن. جوعارى وقۋ ورىندارىنداعى اۋديتوريالار دا قىزىقتى اڭگىمەلەر مەن زياتكەرلىك پىكىرتالاستارعا تولى بولارى ءسوزسىز.
قىمباتتى ءبىلىم الۋشىلار، مۇعالىمدەر مەن اتا-انالار! سىزدەردى ءبىلىم كۇنىمەن قۇتتىقتاي وتىرىپ، بارشاڭىزعا مىقتى دەنساۋلىق تىلەيمىن!