الماتى ءماسليحاتىنىڭ دەپۋتاتى ءاسيا اقانوۆا قالا اۋماعىن كورىكتەندىرۋدىڭ بەكىتىلگەن جاڭا ەرەجەسىنە پىكىر ءبىلدىردى، دەپ حابارلايدى almaty-akshamy.kz.
ونىڭ ايتۋىنشا، شارالاردىڭ كۇشەيۋى ۋاقىتتىڭ جاڭا تالاپتارىنا بايلانىستى.
«ەستەرىڭىزدە بولسا، بيىل كوكتەمدە «تازا قازاقستان» جالپىقازاقستاندىق ناۋقانى اياسىندا مەملەكەت باسشىسىنىڭ باستاماسىن ورىنداۋ بويىنشا ءىس-شارالار باستالدى. وسى باعىتتا قالا اكىمى ەربولات دوسايەۆتىڭ باستاماسىمەن ءار اۋداندى قامتىعان «الماتى – ءبىزدىڭ ورتاق ءۇيىمىز» ناۋقانى باستالدى. ونى ىسكە اسىرۋعا مەگاپوليستىڭ بارلىق تۇرعىنى مەن قوناعى اتسالىستى. الماتى قالاسىنىڭ اۋماعىن كورىكتەندىرۋدىڭ جاڭا ەرەجەسى، مەنىڭ ويىمشا، ورتاق جاۋاپكەرشىلىك قاعيداتىن زاڭداستىرۋدىڭ قيسىندى قورىتىندىسى بولىپ تابىلادى. بۇل ءاربىر الماتىلىقتىڭ جاۋاپكەرشىلىگىن جانە قالانى ءتيىستى جاعدايدا كۇتىپ ۇستاۋعا قاتىسۋى كەرەك دەگەندى بىلدىرەدى»، - دەيدى ءاسيا اقانوۆا.
ءماسليحات دەپۋتاتى جاڭا ەرەجەگە سايكەس مادەني-بۇقارالىق ءىس-شارالاردى ۇيىمداستىرۋشىلار ەندى سول وقيعادان كەيىن تازالاۋ جۇمىستارىن جۇرگىزۋگە مىندەتتى ەكەنىنە نازار اۋداردى.
«مادەنيەت جونىندەگى بەيىندى كوميسسيانىڭ ءتوراعاسى رەتىندە ەلىمىزدىڭ مادەني ءىنجۋ-مارجانى بولىپ تابىلاتىن الماتىدا كوپتەگەن ءىرى ءىس-شارا ۇنەمى وتكىزىلىپ تۇراتىنىن اتاپ وتكىم كەلەدى. ەندى جاڭا ەرەجەگە سايكەس، مۇنداي ءىس-شارالاردى ۇيىمداستىرۋشىلار بۇقارالىق ءىس-شارا وتەتىن ورىندى ءتيىستى كۇيگە كەلتىرۋى كەرەك. بۇل ەكى ميلليون حالقى بار قالا ءۇشىن وتە ماڭىزدى، ويتكەنى، وكىنىشكە قاراي، ءبىر كەرەمەت ءىس-شارادان كەيىن گۇل ەگىلگەن جەردىڭ تاپتالعان ەدى. جاڭا ەرەجە وسىنداي ءىس-شارالاردى وتكىزۋدى رەتتەيدى»، - دەيدى ول.
سونداي-اق، ەرەجەدە شاعىن جانە ورتا كاسىپكەرلىك وكىلدەرىنىڭ جاۋاپكەرشىلىك ايماعىن ايقىنداۋ جونىندەگى تارماق جازىلعان.
«بيزنەستىڭ الەۋمەتتىك جاۋاپكەرشىلىگىن كۇشەيتۋ ءۇشىن كورىكتەندىرۋ ءتولقۇجاتى انىقتالدى. سىرتقى كەلبەتكە، عيماراتتاردىڭ قاسبەتىنە، پاندۋستارعا قويىلاتىن جالپى رەگلامەنتتەۋ تالاپتارى ازىرلەندى. بۇل ءبىزدىڭ قالامىزدىڭ ينكليۋزيا دەڭگەيىن ارتتىرۋعا مۇمكىندىك بەرەدى»، - دەپ ءسوزىن تۇيىندەدى ءاسيا اقانوۆا.
ەستەرىڭىزگە سالا كەتەيىك، 2024 جىلى 19 شىلدەدە VIII سايلانعان ءماسليحاتتىڭ كەزەكتەن تىس ءححى سەسسياسىندا دەپۋتاتتار الماتى قالاسىنىڭ اۋماعىن كورىكتەندىرۋدىڭ جاڭا ەرەجەسىن بەكىتتى. بۇل شارالار ءقاۋىپسىز، ىڭعايلى جانە ەكولوگيالىق قولايلى قالالىق ورتانى قۇرۋعا باعىتتالعان.