ۆەدومستۆونىڭ حابارلاۋىنشا، زارداپ شەككەندەر مەن قازا تاپقاندار جوق.
اقمولا وبلىسىندا ان-2 ۇشاعى اپاتقا ۇشىرادى، دەپ حابارلايدى Almaty-akshamy.kz تجم باسپا ءسوز قىزمەتىنە سىلتەمە جاساپ.
"دەرجاۆينسك قالاسىنان 10 شاقىرىم جەردە ان-2 ۇشاعى ورتەندى. پيلوت جانىپ جاتقان ۇشاقتان وزدىگىنەن ەۆاكۋاسيالاندى ”، – دەپ جازىلعان حابارلامادا.
قۇتقارۋشىلار سەگىز مينۋتتىڭ ىشىندە ءورتتى وقشاۋلادى. قازىرگى تاڭدا ءورت تولىعىمەن سوندىرىلگەن.
كولىك مينيسترلىگى بۇل اپاتتى ارنايى كوميسسيا تەرگەيتىنىن مالىمدەدى. مينيسترلىك دەرەگىنشە، وقيعا جەكسەنبى كۇنى بولعان. UPA0141 نومىرىمەن تىركەلگەن ۇشاق "بۇركىت-اۆيا" جشس-عا تيەسىلى. ان-2 تەحنيكالىق ۇشۋ جاساعان. بورتتا ءبىر پيلوت بولعان.
"وقيعا بويىنشا كولىك مينيسترلىگى اۋە اپاتىن تەرگەۋ ءۇشىن كوميسسيا قۇرىپ جاتىر. دەپارتامەنت قىزمەتكەرلەرى اۋە اپاتى ورنىنا اتتانادى”، - دەلىنگەن حابارلامادا.