الماتى ءماسليحاتىنىڭ VIII شاقىرىلىمىنىڭ XXVI كەزەكتەن تىس سەسسياسىندا دەپۋتاتتار كوپپاتەرلى ۇيلەردىڭ ورتاق مۇلكىن كۇتىپ-ۇستاۋعا ارنالعان ەڭ تومەنگى ءتاريفتى بەكىتتى. سەسسيا بارىسىندا 14 جىلدان استام ۋاقىت قارالماعان تاريفتىك ساياساتتى جاڭارتۋ ماسەلەسى تالقىلاندى، دەپ حابارلايدى aqshamnews.kz
كوپپاتەرلى ۇيلەردىڭ ورتاق مۇلكىن كۇتىپ-ۇستاۋعا ارنالعان ءبىر جىلدىق ەڭ تومەنگى تاريف الماتىدا العاش رەت 2010 جىلى اكىمدىك قاۋلىسىمەن بەكىتىلىپ، 1 شارشى مەتر ءۇشىن 25 تەڭگە بولعان. ونىڭ قولدانىلۋ مەرزىمى 1 جىلمەن شەكتەلگەن بولاتىن. الايدا سودان بەرى قۇرىلىس ماتەريالدارىنىڭ قىمباتتاۋى، قىزمەتكەرلەردىڭ جالاقىسىنىڭ ءوسۋى جانە تۇرعىن ءۇي قىزمەتىنىڭ ساپاسىنا قويىلاتىن تالاپتاردىڭ ارتۋى سىندى ەكونوميكالىق جاعداي ايتارلىقتاي وزگەردى.
سەسسيا بارىسىندا الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆ بيىل جۇمىس توبى كوندومينيۋم نىسانىن باسقارۋ جانە ورتاق مۇلىكتى كۇتىپ-ۇستاۋ ءتاريفىن ەسەپتەۋ ءۇشىن ارنايى ادىستەمەگە سايكەس ەسەپتەۋلەر جۇرگىزگەنىن اتاپ ءوتتى.
تۇرعىن ءۇيدى كۇتىپ-ۇستاۋعا ارنالعان ەڭ تومەنگى ءتاريفتىڭ ۇلعايۋىنا بايلانىستى الەۋمەتتىك وسال توپتاردى قولداۋ ماقساتىندا الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى ءماسليحات شەشىمىنىڭ جوباسىن ازىرلەدى. ءقازىر ماقۇلداۋ كەزەڭىندە تۇرعان بۇل جوبا الەۋمەتتىك وسال توپتارعا جاتاتىن تۇرعىن ءۇي يەلەرىنە قوسىمشا الەۋمەتتىك كومەك كورسەتۋدى كوزدەيدى.
- كوپپاتەرلى تۇرعىن ۇيلەردى باسقارۋعا ارنالعان شىعىنداردى ەسەپتەۋ ادىستەمەسىنە ەنگىزىلگەن مىندەتتى قىزمەتتەر تىزىمىنە باسقارۋ قىزمەتى (ۇلەسى 30%-دان اسپايدى) جانە قىزمەت كورسەتۋ قىزمەتى (ۇلەسى كەمىندە 70%) كىرەدى.
- جاڭا ەڭ تومەنگى تاريفتەردى قابىلداۋ مەن قوسىمشا الەۋمەتتىك قولداۋ شارالارىن ازىرلەۋ ازاماتتاردىڭ ءومىر ءسۇرۋ جاعدايلارىن جاقسارتۋعا جانە كوپپاتەرلى ۇيلەرگە كورسەتىلەتىن قىزمەت ساپاسىن ارتتىرۋعا باعىتتالعان.
تۇرعىن ءۇيدى باسقارۋ مەن كۇتىپ-ۇستاۋدىڭ زاماناۋي ستاندارتتارىن ەنگىزۋ قاجەتتى جۇمىستاردى ۋاقىتىلى جۇرگىزۋگە، ۇيلەردىڭ سانيتارلىق جانە تەحنيكالىق جاعدايىن جاقسارتۋعا، سونداي-اق قارجىنىڭ ءتيىمدى ءارى اشىق پايدالانىلۋىن قامتاماسىز ەتۋگە مۇمكىندىك بەرەدى.