الماتىدا كوپ قاباتتى ۇيلەردىڭ كىرەبەرىسى مەن جەرتولەسىندە، قالىڭ ءشوپ اراسىندا جىلاندار ءورىپ ءجۇر.
قالا ىشىندە جىلانداردىڭ پايدا بولۋى – جاز مەزگىلىندەگى ەڭ وزەكتى ماسەلەنىڭ ءبىرى، دەپ حابارلايدى Almaty-akshamy.kz.
قالا تۇرعىندارى ۇيلەردىڭ اراسىندا ءورىپ جۇرگەن جىلانداردىڭ ۆيدەوسىن الەۋمەتتىك جەلىدە تاراتىپ جاتىر.
- مەن اۋداندا جىلاندى ءجيى كورەمىن. ولار كوپ قاباتتى ۇيلەردىڭ ماڭىندا جۇرەدى. ءبىز قالانىڭ شەتىندە تۇرامىز. بالالارىمىزدىڭ قاۋىپسىزدىگىنە الاڭداي باستادىق، – دەدى الماتىداعى «زەردەلى» شاعىناۋدانىنىڭ تۇرعىنى ايگەرىم ابدان.
بۇل اقپاراتتى الاتاۋ اۋدانىندا ورنالاسقان №148 بوبەكجاي-بالاباقشانىڭ مەڭگەرۋشىسى رايا شاراپييەۆا دا راستاپ وتىر. ونىڭ ايتۋىنشا، بالاباقشا اۋماعىندا ناۋرىز ايىندا جىلانعا قارسى دەزينفەكسيا جۇرگىزىلگەن. كەلەسى كەزەڭ شىلدە ايىنا جوسپارلانعان.
قالا ىشىندە جىلانداردىڭ پايدا بولۋى – جاز مەزگىلىندەگى ەڭ وزەكتى ماسەلەنىڭ ءبىرى. ولاردىڭ اۋداندا عانا كورىنبەي، بالاباقشا اۋماعىنا دا كىرگەنى ءبىزدى الاڭداتتى. باقىتىمىزعا وراي، جىلان ەشكىمدى شاققان جوق. تاربيەشىلەرمەن بىرگە كۇندەلىكتى ءتۇسىندىرۋ جۇمىسىن جۇرگىزەمىز.
بالالاردى دالاعا شىعارماس بۇرىن، ويىن الاڭدارىن تەكسەرەمىز. ءار توپتىڭ تاربيەشىسى بالالاردىڭ جانىندا، كوزدەن تاسا قىلمايدى. سونداي-اق اتا-انالاردان سەرۋەن كەزىندە بالالارىن ويىن الاڭدارىندا جالعىز قالدىرماۋىن سۇرايمىن، – دەدى رايا شاراپييەۆا.
زوولوگيا ينستيتۋتىنىڭ گەرپەتولوگ مامانى يۋليا زيما قالا ىشىندە جىلانداردىڭ نەلىكتەن كوبەيىپ كەتكەنىن ءتۇسىندىردى.
قالا قارقىندى دامىپ كەلەدى، جىلاندار مەكەندەگەن دالالاردىڭ ورنىندا جاڭا شاعىناۋداندار پايدا بولىپ جاتىر. جەردى يگەرگەننەن كەيىنگى العاشقى جىلداردا دا جىلان شىعادى، ءبىراق بىرتە-بىرتە جوعالىپ كەتەدى، – دەيدى مامان.
ونىڭ ايتۋىنشا، الماتى قالاسىنىڭ ماڭىندا ۋلى جىلاننىڭ ەكى ءتۇرى عانا مەكەندەيدى. ولار – دالا جىلانى مەن كادىمگى قالقانتۇمسىق جىلان. مەگاپوليستە ادامدار كوبىنە ورنەكتى جانە سۋ جىلانىن كەزدەستىرەدى. ولار ءقاۋىپتى ەمەس. شاعىپ السا دا، تەز جازىلىپ كەتەدى. دەسەك تە، ساقتىق شارالارىن ساقتاعان ءجون. ەگەر جىلان شاعىپ السا، مىندەتتى تۇردە دارىگەرگە جۇگىنۋ كەرەك.