الماتىدا قازاقستان رەسپۋبليكاسى كونستيتۋسياسىنىڭ 30 جىلدىعىنا وراي «ءتيىمدى پارلامەنت: ازاماتتاردىڭ كونستيتۋسيالىق قۇقىقتارى» اتتى «دوڭگەلەك ۇستەل» ءوتتى.
ءىس-شارانى الماتى قالاسىنىڭ قوعامدىق دامۋ باسقارماسى ۇيىمداستىردى. تالقىلاۋعا قالالىق ءماسليحات دەپۋتاتتارى، زاڭگەرلەر، تاريحشىلار، وقىتۋشىلار، ساراپشىلار جانە قالانىڭ بەلسەندى جاستارى قاتىستى.
اتالمىش جيىندى قوعامدىق دامۋ باسقارماسىنىڭ باسشىسى ايدار ەسەنبەكوۆ اشىپ، جۇرگىزىپ وتىردى. الدىمەن القالى جيىنعا قاتىسۋشىلاردى اتا زاڭنىڭ مەرەيلى بەلەسىمەن قۇتتىقتاعان سپيكەر كۇشتى جانە ءادىل مەملەكەت قۇرۋداعى كونستيتۋسيانىڭ ماڭىزدىلىعىن اتاپ ءوتتى.
"كونستيتۋسيا – ءبىزدىڭ تاۋەلسىزدىگىمىزدىڭ ىرگەتاسى، ءاربىر ازاماتتىڭ قۇقىقتارى مەن بوستاندىقتارىنىڭ قاينار كوزى. وسىدان ءدال 30 جىل بۇرىن ءبىز دەموكراتيالىق، قۇقىقتىق جانە زايىرلى مەملەكەتتىڭ پايداسىنا تاڭداۋ جاسادىق. بۇگىنگى تاڭدا وسى جولدى جالعاستىرا وتىرىپ، كونستيتۋسيالىق نورمالارعا قۇرمەتپەن قاراۋ، قۇقىقتىق مادەنيەتتى قالىپتاستىرۋ جانە جاۋاپتى ۇرپاقتى تاربيەلەۋ ماڭىزدى"، – دەپ اتاپ ءوتتى ول.
"كونستيتۋسيا تەك قۇقىقتىق جۇيەنى عانا ەمەس، حالىقتىڭ تاريحي جولىن دا كورسەتەدى. ءبىز قازاقستاننىڭ بەيبىتشىلىك، ادىلدىك جانە بىرلىك قۇندىلىقتارىنا سۇيەنە وتىرىپ، ءوزىنىڭ مەملەكەتتىلىگىن قالاي قۇرايتىنىن كورەمىز. بۇل پروسەستە پارلامەنت اعارتۋشىلىق جانە بىرىكتىرۋشى ءرول اتقارادى، اسىرەسە جاستاردىڭ بۇل بايلانىستى ءبىلۋى وتە ماڭىزدى"، – دەپ اتاپ ءوتتى تاريح عىلىمدارىنىڭ كانديداتى، تاريح جانە ەتنولوگيا ينستيتۋتىنىڭ ەتنولوگيا جانە انتروپولوگيا ءبولىمىنىڭ مەڭگەرۋشىسى اقسۇڭقار ابدۋلينا.
ەتنوسارالىق كەلىسىمنىڭ قۇندىلىعىنا پروفەسسور، حالىقارالىق اقپاراتتاندىرۋ اكادەمياسىنىڭ اكادەميگى، جوبالاردى باسقارۋ ينستيتۋتىنىڭ (Project Management Institute) مۇشەسى الەكسەي سەحوۆ ەرەكشە نازار اۋداردى. ول ءوز سوزىندە كونستيتۋسيا كوپۇلتتى قوعامداعى بىرلىكتىڭ باستى قۇرالى ەكەنىن اتاپ ءوتتى.
"قازاقستاندا 130-دان استام ەتنوس تۇرادى جانە ولاردىڭ بەيبىت قاتار ءومىر سۇرۋىنە كونستيتۋسيا قۇقىقتىق نەگىز بولىپ تابىلادى. ءبىز ءتىلىمىز، مادەنيەتىمىز، داستۇرلەرىمىز بويىنشا ەرەكشەلەنەمىز، ءبىراق ورتاق تاريح پەن بولاشاقپەن بايلانىستى حالىق رەتىندە بىرگەمىز. پارلامەنت بۇل تەپە-تەڭدىكتى ساقتاۋدا، بارلىعىنىڭ قۇقىقتارى مەن بوستاندىقتارىن قامتاماسىز ەتۋدە شەشۋشى ءرول اتقارادى"، - دەدى ول
"دوڭگەلەك ۇستەل" قورىتىندىسى بويىنشا قۇقىقتىق اعارتۋعا، بيلىك ورگاندارى مەن حالىق اراسىنداعى ديالوگقا، سونداي-اق جاستاردى زاڭنامالىق جانە قوعامدىق باستامالارعا تارتۋعا قاتىستى ۇسىنىستار ازىرلەندى.