الماتىدا 12 تامىز ساعات 19:00-دەگى جاعداي بويىنشا 27 مم كولەمىندە جاڭبىر جاۋدى، دەپ حابارلايدى Almaty-akshamy.kz
بۇل «قازگيدرومەت» رمك مالىمەتى بويىنشا ءبىر ايلىق نورمانىڭ 80%-ىن قۇرايدى (تامىز ايىندا 33 مم).نوسەرلەتىپ جاۋعان قىسقا مەرزىمدى جاڭبىردىڭ سالدارىنان قالانىڭ كەيبىر اۋدانداردىڭ كوشەلەرى مەن اۋلالارىن سۋ باستى. جاڭبىر باستالعالى بەرى 52 ءموبيلدى بريگادا مەن 27 موتوپومبا جۇمىلدىرىلدى.
قازىرگى ۋاقىتتا سۋ تاسقىنىن جويۋعا كۇشەيتىلگەن رەجيمدە 1008 جول قىزمەتكەرى مەن 640 ارنايى تەحنيكا جۇمىلدىرىلعان. بۇل جۇمىستار بارلىق قالالىق توتەنشە جاعدايلار قىزمەتتەرى، تجد كۇشتەرى مەن جوندەۋ جۇمىستارىنا اينالىساتىن ۇيىمداردى تارتا وتىرىپ جۇرگىزىلۋدە. مەدەۋ اۋدانىنىڭ اكىمدىگى اۋداندىق توتەنشە جاعدايلار دەپارتامەنتىمەن بىرلەسىپ، كوشكىن ءقاۋپى بار ايماقتارعا تەكسەرۋ جۇرگىزدى. توپىراقتىڭ ءتۇسۋ جاعدايلارى بولعان جوق.
الدىن الا 11 تامىزدا «قازگيدرومەت» رمك 12 تامىز كۇنى كەشكە جاڭبىر جاۋاتىنىن ەسكەرتكەن بولاتىن. سوعان بايلانىستى كەشەدەن بەرى قالانىڭ كوممۋنالدىق قىزمەتتەرى سۋ تاسقىنىنىڭ الدىن الۋ جانە كەدەرگىسىز سۋ اعۋىن قامتاماسىز ەتۋ ماقساتىندا 320 جۇمىسشى مەن 89 بىرلىك ارنايى تەحنيكا تارتا وتىرىپ، كانال جەلىلەرىنىڭ پروبلەمالىق ايماقتارىن، ارنا وتكەلدەرىن جانە قوقىستاردى جيناۋعا ارنالعان «تۇزاقتاردى» تازالاۋ جۇمىستارى ۇيىمداستىرىلدى. سونىمەن قاتار، 2 مىڭنان استام قۇم سالىنعان قاپتار دايىندالدى.
ارىق جەلىلەرى مەن وتكەلدەر دۇرىس جۇمىس ىستەپ تۇر، الايدا جوعارى جاقتان قالا ورتالىعىنا كەلەتىن نوسەر سۋىنىڭ ءانومالدى كولەمىنە بايلانىستى سۋ تاسقىنى جول جيەگى مەن ىرگەلەس اۋماقتارعا اعىپ جاتىر. ءبىراق بۇل ۋاقىتشا قۇبىلىس. جاعداي جاقىن ارادا تۇراقتالادى. بارلىق زارداپتار جاۋىن-شاشىن توقتاعاننان كەيىن بىردەن جويىلادى.