الماتىدا تەحنيكالىق جانە كاسىپتىك ءبىلىم بەرۋ (تجكب) جۇيەسى قارقىندى دامىپ كەلەدى. قازاقستاندا جاريالانعان جۇمىسشى ماماندىقتار جىلىندا وسى ماسەلەگە كوپ كوڭىل ءبولىندى. بۇگىندەرى قالالىق تجكب جەلىسىنە 88 كوللەدج كىرەدى، ونىڭ ىشىندە 22ء-سى مەملەكەتتىك تە، 66-سى جەكەمەنشىك. وندا 85 544 ادامنىڭ 46 838ء-ى مەملەكەتتىك تاپسىرىس بويىنشا ءبىلىم الىپ جاتىر. وڭىرلىك كوممۋنيكاسيالار قىزمەتىندە الماتى قالاسى ءبىلىم باسقارماسىنىڭ باسشىسى سايران سايفەدەنوۆ وسىلاي دەپ مالىمدەدى.
2025-2026 وقۋ جىلىنا مەملەكەتتىك گرانتقا 18 مىڭنان استام ءوتىنىش تۇسكەن. تالاپكەرلەردى تامىز ايىنىڭ سوڭىنا دەيىن قابىلدايدى. ءقازىر ماماندار 131 ماماندىق، 220 بىلىكتىلىك بويىنشا ءبىلىم الىپ جاتىر.
بيىل كوللەدجدەردى جاڭعىرتۋ جاعى دا كۇشەيتىلدى. «جاس مامان» جوباسى اياسىندا 18 وقۋ ورنى قۇرال-جابدىقپەن جابدىقتالدى. بۇعان 4،2 ملرد تەڭگە جۇمسالماق. سونداي-اق، بيىل جوندەۋ جۇمىسىنا 2،4 ملرد تەڭگە ءبولىندى. ونىڭ 170 ملن تەڭگەسى التى كوللەدجدىڭ ماتەريالدىق بازاسىن جاڭارتۋعا جۇمسالدى.
الماتىدا تەحنيكالىق جانە كاسىپتىك ءبىلىم بەرۋ سالاسىنا ەرەكشە كوڭىل ءبولىنىپ وتىر. ءقازىر قالادا ءبىرقاتار جاڭا جوبا قولعا الىنعان. سونىڭ ىشىندەگى ەڭ ۇلكەنى - الماتى كولىك جانە مەحانيكا كوللەدجىنىڭ جاڭا عيماراتى. ول 1050 ستۋدەنتكە ەسەپتەلگەن، ىشىندە 120 ورىندىق جاتاقحانا بولادى. تاعى ءبىر كوللەدجدە بولەك، تاعى ءبىر كوللەدجدە 300 ورىندىق قوسىمشا عيمارات سالىنادى. ولاردى قاراشا ايىنىڭ سوڭىنا قاراي قولدانىسقا بەرۋ جوسپارلانعان.
الاتاۋ اۋدانىنداعى العاباس ىقشاماۋدانىندا يننوۆاسيالىق تەحنيكالىق كوللەدج سالۋ باستالىپ كەتتى. جوبا اياسىندا وقۋ كورپۋسى، جاتاقحانا، شەبەرحانالار، سپورت جانە دەمالىس الاڭدارى، تولىق ينفراقۇرىلىم سالۋ كوزدەلگەن. قۇرىلىسى 2026 جىلدىڭ اقپانىنا تامان اياقتالماق.
قالالىق تجكب جۇيەسىنە بولىنگەن بيۋدجەت – 52،1 ملرد تەڭگە. ونىڭ 679 ملن تەڭگەسى تالىمگەرلىك باعدارلامالاردى دامىتۋعا، WorldSkills چەمپيوناتىن وتكىزۋگە، جاتاقحانا كۇتىمى مەن كوللەدجدەردى قارجىلاي قولداۋعا باعىتتالدى.
جۇمىسشى ماماندىقتار جىلى اياسىندا جاسالىپ جاتقان ءىس-شارالار جاستارعا جاڭا مۇمكىندىك ۇسىنىپ، ەڭبەك نارىعىندا سۇرانىسقا يە كادرلاردى دايارلاۋعا جول اشىپ وتىر.