الماتىدا «مەكتەپ اۆتوبۋسى» جوباسى اياسىندا اۆتوبۋستار مەن رەيستەر سانى قىسقارتىلدى، سوعان قاراماستان اتا-انالاردىڭ سۇرانىسى مەن قاۋىپسىزدىك تالاپتارىن ەسكەرە وتىرىپ وقۋشىلاردى تاسىمالداۋ جاعى ساقتالىپ قالدى.
«ءبىز ءبىلىم بەرۋ ۇيىمدارىمەن جۇمىس ىستەپ، مەكتەپتەردەن ءوتىنىش قابىلدادىق تا، اۆتوبۋستاردىڭ سانىن قىسقارتۋ تۋرالى شەشىم شىعاردىق. وقۋشىلاردى تاسىمالداۋدى ءوتىنىشتى ەسكەرە وتىرىپ سول كۇيى قالدىردىق»، – دەدى الماتى قالاسى ءبىلىم باسقارماسىنىڭ باسشىسى سايران سايفەدەنوۆ الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە.
بۇعان دەيىن جوبا اياسىندا قالاداعى 55 مەكتەپ انىقتالىپ، 10 180 وقۋشى قامتىلعان بولاتىن. ولاردى تاسىمالداۋ ءۇشىن 181 اۆتوبۋس ءبولىنىپ، ولار كۇن سايىن 897 رەيس جاسادى. ءبىر رەيستىڭ قۇنى 20 ورىندىق اۆتوبۋسقا 27 423 تەڭگە (646 رەيس)، ال 36 ورىندىق اۆتوبۋسقا 29 967 تەڭگەدەي (251 رەيس) بولدى. بۇل ماقساتقا جىلىنا 4 ملرد 164 ملن تەڭگە قاجەت بولعان.
الايدا بيىل ءبىلىم بەرۋ ۇيىمدارىمەن قوسىمشا جۇمىس جۇرگىزىلىپ، ناتيجەسىندە اۆتوبۋستار سانى 49-عا قىسقارتىلدى. كولىكتى الىپ تاستاۋعا 24 مەكتەپ ءوتىنىش بەرگەن. ناتيجەسىندە ءقازىر قالاداعى 44 مەكتەپتىڭ 7 532 وقۋشىسى تاسىمالداۋمەن قامتىلاتىن بولدى. ولاردى 132 اۆتوبۋس جەتكىزەدى، ءسويتىپ كۇنىنە 663 رەيس جاسايدى، بۇل بۇرىنعىدان 234 رەيسكە از.
جوسپار بويىنشا، 2025 جىلى 22 مەكتەپتە 5 495 وقۋشىنى تاسىمالداۋ ءۇشىن 92 اۆتوبۋس قاجەت بولىپ وتىرعان. وسىعان بايلانىستى قالالىق موبيلدىلىك باسقارماسى جاڭا اۆتوبۋستار ساتىپ الۋدى جوسپارلاعان. بۇل جىل سوڭىنا دەيىن وقۋشىلاردى تاسىمالداۋمەن قامتۋدى 15 915 بالاعا جەتكىزىپ، 283 اۆتوبۋستى پايدالانۋعا مۇمكىندىك بەرەر ەدى. الايدا مەكتەپتەردىڭ ءوتىنىشى مەن جۇرگىزىلگەن وڭتايلاندىرۋ بيۋدجەت شىعىندارىن قىسقارتىپ، وقۋشىلاردى تاسىمالداۋ جۇيەسىن ساقتاپ قالىپ، ونى اتا-انالاردىڭ سۇرانىسى مەن مەكتەپتىڭ قاجەتتىلىكتەرىنە ساي ۇيىمداستىرۋعا جول اشتى.