الماتىدا مەكتەپتەردىڭ جاڭا وقۋ جىلىنا دايارلىعى اياقتالىپ قالدى. اسىرەسە ءبىرىنشى سىنىپ وقۋشىلارىن قابىلداۋعا، ولاردى وقۋلىقپەن قامتىپ، باستاۋىشتاعىلارعا تەگىن تاماقتاندىرۋ جاعىن ۇيىمداستىرۋعا كوپ كوڭىل ءبولىنىپ جاتىر. قالالىق ءبىلىم باسقارماسىنىڭ مالىمەتىنشە، 2025 جىلعى 20 تامىزدا ءبىرىنشى سىنىپقا 26 991 بالا قابىلدانعان. ولاردىڭ 57%-ى وقۋىن قازاق تىلىندە، 42%-ى ورىس تىلىندە باستاماق.
«ءبىزدىڭ باستى ماقساتىمىز – ءار بالانىڭ وقۋ جىلىن تولىق دايارلىقپەن باستاپ، وقۋلىقپەن، تاماقپەن، قاجەت بولعان جاعدايدا قولداۋ كورۋىنە كوڭىل ءبولۋ. بۇلاردى مەكتەپتەرمەن، اتا-انالارمەن بىرلەسە وتىرىپ ۋاقتىلى ىسە اسىرىپ جاتىرمىز»، - دەدى الماتى قالاسىنىڭ ءبىلىم باسقارماسىنىڭ باسشىسى سايران سايفەدەنوۆ بريفينگ كەزىندە.
جاڭا وقۋ جىلىندا 1–4 سىنىپ وقۋشىلارىن تەگىن تاماقتاندىرۋعا 16،8 ملرد تەڭگە ءبولىندى. ياعني، بۇل 127 مىڭنان استام بالا تەگىن ىستىق تاماقپەن قامتىلادى دەگەن ءسوز. الەۋمەتتىك قولداۋ كورسەتۋ جاعى دا ۇمىت قالعان جوق. «مەكتەپكە جول» رەسپۋبليكالىق اكسياسى اياسىندا «ۆسەوبۋچ» قورى 13 مىڭ بالاعا مەكتەپ فورماسىن ساتىپ الۋعا 715 ملن تەڭگە، الەۋمەتتىك وسال وتباسىدان شىققان 10 مىڭنان استام وقۋشىنى تاماقتاندىرۋعا 1،4 ملرد تەڭگە ءبولدى. ونىڭ 74%-ىن اتا-انالاردىڭ بانك كارتاسىنا اۋدارىپ ۇلگەردى.
وقۋلىقپەن قامتۋ دا ەرەكشە باقىلاۋعا الىنعان. 2025–2026 وقۋ جىلىنا الماتى قالاسى 3،3 ملرد تەڭگەگە 884 مىڭنان استام وقۋلىق ساتىپ الىپ جاتىر. بارلىق باسپامەن، جەتكىزۋشىلەرمەن كەلىسىمشارتتار جاسالىپ قويعان، بۇل وسى كىتاپتاردى مەكتەپتەرگە دەر كەزىندە جەتكىزۋگە مۇمكىندىك بەرمەك.