الماتىدا كولىك ۇرىسى قولعا ءتۇستى

ۇرىنىڭ قاڭتار وقيعاسى كەزىندە دە توناۋعا قاتىسقانى انىقتالدى

بەلگىلى بولعانداي، قالانىڭ ناۋرىزباي اۋدانىندا ەكى مۇلىكتىك قىلمىس ورىن العان. قاسكوي تۇندە جەكە ءۇيدىڭ شارباقتارىنان سەكىرىپ جۇرگەن. كوشە كامەرالارىنىڭ بىرىنە بوگدە اۋماققا كىرۋ ءساتى ءتۇسىپ قالعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ادەتتە، جەكە سەكتوردا، ءوز ءۇيىنىڭ اۋلاسىندا كولىك يەلەرى ەسىكتى كىلتكە قۇلىپتامايدى. قاسكوي وسىنى پايدالاندى. كولىكتىڭ سالونىن مۇقيات “تەكسەرگەن” ول كەز كەلگەن قۇندى دۇنيەنىڭ ءبارىن الىپ كەتكەن. قوجايىندارى ۇيىقتاپ جاتقاندا ۇيگە كىرىپ، باعالى زاتتاردى دا الىپ كەتكەن. جەدەل ىزدەستىرۋ ءىس-شارالارى بارىسىندا جەدەل ۋاكىلدەر كۇدىكتىنى ۇستادى. ول تۇركىستان وبلىسىنىڭ تۋماسى، 30 جاستاعى و.ەسىمدى ازامات بولىپ شىقتى. وسى دەرەك بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 188-بابى 3-بولىگىنە (ۇرلىق) سايكەس قىلمىستىق ءىس تىركەلدى. تەرگەۋشىلەر ءىستىڭ ءمان-جايىن انىقتاپ، ۇستالعان ازاماتتىڭ قالادا جاسالعان وسىعان ۇقساس قىلمىستارعا قاتىسى بار-جوعىن تەكسەرۋى كەرەك. ازىرگە كۇدىكتى ءپد-نىڭ ۋاقىتشا ۇستاۋ يزولياتورىنا قامالدى»، – دەدى ناۋرىزباي اۋداندىق پب باستىعى ديدار احانوۆ.

سونىمەن قاتار، تەرگەۋدىڭ وسى كەزەڭىندە ۇستالعان ازاماتتىڭ قاڭتار وقيعاسى كەزىندە جاسالعان توناۋعا قاتىسى بار ەكەندىگى دالەلدەندى.

«سول كەزدە ول سۋپەرماركەتتەن ازىق-تۇلىك سالىنعان بىرنەشە اربانى الىپ شىققان. بۇل قىلمىستىڭ جاسالعان ءساتى دە بەينەباقىلاۋ كامەرالارىنا جازىلىپ قالعان. تىكەلەي ايعاقتارمەن اشكەرەلەنگەن كۇدىكتى ءوز كىناسىن مويىنداپ، ىستەگەن ىسىنە تولىقتاي وكىنەتىنىن مالىمدەدى»، – دەدى احانوۆ.