الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ م.ا. مارات پاشيموۆ مەديسينالىق ۇيىمداردىڭ باسشىلارىمەن كەزەكتى كەڭەس وتكىزدى.
كەزدەسۋ بارىسىندا ءمامس، ءتيىستى فارماسيەۆتيكالىق تاجىريبە ستاندارتىنىڭ (GPP) ەنگىزىلۋى، حالىقتى ۆاكسينالاۋمەن قامتۋ، پسيحياتريالىق جانە ناركولوگيالىق قىزمەتتى جاڭعىرتۋ، سونداي-اق كارديولوگيالىق كومەكتى دامىتۋ ماسەلەلەرى قارالدى، دەپ حابارلايدى aqshamnews.kz.
ەرەكشە نازار ءتيىستى فارماسيەۆتيكالىق تاجىريبەگە اۋدارىلدى.
بۇل دۇنيەجۇزىلىك فارماسيەۆتيكالىق فەدەراسيا (FIP) مەن دۇنيەجۇزىلىك دەنساۋلىق ساقتاۋ ۇيىمى (ددسۇ) ازىرلەگەن حالىقارالىق ستاندارت.
وندا ءدارىحانانىڭ ناۋقاستى ءقاۋىپسىز، ءتيىمدى جانە ۇتىمدى دارى-دارمەكپەن قامتاماسىز ەتۋى ءۇشىن قالاي جۇمىس ىستەۋى كەرەك ەكەنى ايقىندالعان.
GPP - ءدارىحانا جۇمىسىنىڭ «التىن ستاندارتى»، ول دارى-دارمەكتى الۋ مەن فارماسيەۆتىڭ كاسىبي سۇيەمەلدەۋىن قامتاماسىز ەتەدى.
مارات پاشيموۆ بارلىق مەديسينالىق ۇيىمعا جىل سوڭىنا دەيىن سەرتيفيكات الۋدى تاپسىردى. بۇل - مەديسينالىق كومەكتىڭ ساپاسى مەن بىرىزدىگىن ارتتىرۋداعى ماڭىزدى قادام.
7 ايداعى ۆاكسينالاۋمەن قامتۋ دەڭگەيى جەتكىلىكسىز. ەڭ كوپ ولقىلىق جەكە مەديسينالىق ۇيىمداردا بايقالادى. بۇل اقپاراتتى قدسب ەپيدەميولوگيالىق باقىلاۋ ءبولىمىنىڭ باسشىسى باكجانار مۋحامادييەۆا باياندادى. قدسب باسشىسى م.ا. تاپسىرماسى بويىنشا جىل سوڭىنا دەيىن كورسەتكىشتى تەڭەستىرۋ جانە بەلگىلەنگەن ينديكاتورعا قول جەتكىزۋ قاجەت.
پسيحيكالىق دەنساۋلىق ساقتاۋ قىزمەتىن جاڭعىرتۋ بارىسى تۋرالى الماتى قالالىق پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ باياندادى. ونىڭ ايتۋىنشا، پسيحياتريالىق كومەكتى ەمحانالىق جەلىمەن ىقپالداستىرۋ جالعاسىپ كەلەدى: قالاداعى 8 اۋداننىڭ ەمحانالارىندا العاشقى پسيحيكالىق دەنساۋلىق ورتالىقتارى جۇمىس ىستەيدى، وندا دارىگەر-پسيحياتر قابىلدايدى. وسىلايشا، پسيحياتريالىق كومەك حالىق ءۇشىن اناعۇرلىم قولجەتىمدى بولا ءتۇستى.
ورتالىق ءپسيحوبىلىم بەرۋ باستامالارىن دا بەلسەندى دامىتىپ كەلەدى: 2019 جىلدان بەرى «مەنتالدىق ءبىلىم بەرۋ مەكتەبى» جۇمىس ىستەيدى، جاعدايلىق ورتالىق اشىلدى، ۇكىمەتتىك ەمەس ۇيىمدارمەن ىنتىماقتاستىق كەڭەيىپ كەلەدى. سونداي-اق ەڭبەك ارقىلى وڭالتۋ دامىپ جاتىر: تىگىن سەحى، باسپاحانا جانە قوراپ جاساۋ سەحى جۇمىس ىستەيدى.
قالا كولل-ورتالىعىمەن ىقپالداستىرىلعان تاۋلىك بويى جۇمىس ىستەيتىن «سەنىم تەلەفونى» (376-56-60، 8-708-983-2863) سۇرانىسقا يە بولىپ وتىر: 2025 جىلدىڭ العاشقى التى ايىندا 3 499 قوڭىراۋ ءتۇستى، بۇل 2024 جىلدىڭ سايكەس كەزەڭىمەن سالىستىرعاندا 18 پايىزعا كوپ.
مارات پاشيموۆ ەمحانالىق پسيحولوگتاردى قوسىمشا وقىتۋدى ۇيىمداستىرۋدى تاپسىردى.
كەڭەستىڭ بولەك بلوگى كارديولوگيالىق قىزمەتتىڭ جۇمىسىنا ارنالدى. بۇگىندە الماتىدا بسك بار ناۋقاستارعا 13 ستاسيونار كومەك كورسەتەدى، سونىڭ ىشىندە جەدەل كورونارلىق سيندروم كەزىندە شۇعىل كومەك كورسەتەتىن جەتى ورتالىق بار.
التى ايدا قان اينالىم جۇيەسى اۋرۋلارىن انىقتاۋعا 104 مىڭنان استام ادام سكرينينگتەن ءوتتى. ولاردىڭ 90 پايىزدان استامى ديسپانسەرلىك ەسەپكە الىندى، بۇل وتكەن جىلدىڭ كورسەتكىشىنەن 14،7 %-عا جوعارى.
سوزىلمالى جۇرەك جەتكىلىكسىزدىگى بار ناۋقاستارمەن جۇمىستا دا وڭ ديناميكا بايقالادى. جۇرەك جەتكىلىكسىزدىگىنىڭ ەرتە ءتۇرىن دياگنوستيكالاۋ جاقسارىپ، اۋىر تۇرلەر سانى ازايدى. العاش رەت 1138 ادامعا دياگنوز قويىلدى، زەرتحانالىق جانە اسپاپتىق دياگنوستيكامەن قامتۋ ارتتى. كارديوۆەرتەر-دەفيبريللياتور ورناتۋ سانى ءۇش ەسە ءوسىپ، ومىرگە ءقاۋىپتى اريتميادان بولاتىن ءولىم-جىتىمدى تومەندەتۋگە ىقپال ەتتى.
كەڭەس سوڭىندا مارات پاشيموۆ كوتەرىلگەن بارلىق ماسەلە قالانىڭ دەنساۋلىق ساقتاۋ جۇيەسى ءۇشىن باسىم باعىت بولىپ قالا بەرەتىنىن اتاپ ءوتتى. ول بەلگىلەنگەن ينديكاتورلارعا ۋاقتىلى قول جەتكىزۋدىڭ جانە الماتىداعى مەديسينالىق كومەكتى كەشەندى جاڭعىرتۋدى جالعاستىرۋدىڭ ماڭىزىن ەرەكشە ايتتى.