الماتىداعى اۋا-رايىنىڭ قولايسىزدىعى: كوممۋنالدىق قىزمەتتەر كوكتايعاققا دايىندالۋدا
«قازگيدرومەت» رمك دەرەكتەرى بويىنشا، 16 اقپاننىڭ تاڭىنان باستاپ 17 اقپاننىڭ تۇنىنە دەيىن الماتى قالاسىندا جاۋىن-شاشىن بولادى، جاۋىن-شاشىننىڭ ارتى قالىڭ قارعا ۇلاسىپ، اۋا تەمپەراتۋراسى كەشكە قاراي مينۋس 20 گرادۋسقا دەيىن تومەندەيدى، دەپ حابارلايدى almaty-akshamy.kz الماتى قالاسى كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
17 اقپانعا قاراعان ءتۇنى مينۋس 22 گرادۋسقا دەيىن، كۇندىز 17 اقپاندا مينۋس 14-كە دەيىن. ال، 16 اقپاندا تاڭەرتەڭ تۇمان، جولداردا كوكتايعاق بولادى دەپ بولجانۋدا. تۇنگى كەزەڭدە كوكتايعاق قۇبىلىستارىنىڭ الدىن الۋ ماقساتىندا ديسلوكاسيا ورىندارىندا 176 قۇم تاراتقىشتىڭ كەزەكشىلىگى جوسپارلانعان. قار تازالاۋ جۇمىستارىنا بارلىعى 483 بىرلىك ارنايى تەحنيكا مەن 1180 جول جۇمىسشىسى جۇمىلدىرىلادى.
بولجامدى كوكتايعاققا، جولداردىڭ ءجۇرىس بولىگىن قاردىڭ باسۋىنا، تروتۋارلارداعى كوكتايعاققا بايلانىستى اۆتوكولىك جۇرگىزۋشىلەرى مەن جاياۋ جۇرگىنشىلەردەن قاۋىپسىزدىك شارالارىن ساقتاۋدى سۇرايمىز. جۇرگىزۋشىلەرگە جىلدامدىقتى تومەندەتۋگە، اۆتوموبيلدەر اراسىنداعى قاشىقتىقتى ارتتىرۋعا، قاتارلاردى ساقتاۋعا جانە كەنەتتەن مانيەۆرلەردەن اۋلاق بولۋعا كەڭەس بەرەمىز.
16 اقپاندا قاردى تازالاۋ جانە 17 اقپاندا تۇنگى كەزەڭدە قاردى جاپپاي سىرتقا شىعارۋ بويىنشا ارنايى تەحنيكا كولوننالارىنىڭ جۇرۋىنە بايلانىستى اۆتوكولىكتى جول جيەكتەرىنە قويماۋدى سۇرايمىز.