سۋ شارۋاشىلىعى جۇيەسىنە تالداۋ جۇرگىزىلدى.
الماتى كوشەلەرىن جاۋىن-شاشىن كەزىندە سۋ باسىپ كەتەتىنى بەلگىلى. وسى ماسەلەنى شەشۋ ءۇشىن ارىق جەلىلەرىن، نوسەر كارىزدەرىن سالۋعا جانە جاڭارتۋعا جوبالىق-سمەتالىق قۇجات ازىرلەندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قالالىق جاسىل ەكونوميكا باسقارماسى باسشىسىنىڭ مىندەتىن اتقارۋشى سەرىك ادىلبايەۆتىڭ ايتۋىنشا، سۋ شارۋاشىلىعى جۇيەسىنە تالداۋ جۇرگىزىلدى.
«جاۋىن-شاشىن كەزىندە اعىندى سۋلاردىڭ 90%-ى ارىق جەلىلەرى، جولدار ارقىلى ءوتىپ، ارى قاراي وزەندەرگە قۇيادى. تەك 10%-ى عانا كوللەكتوردىڭ ارنايى سۋ بۇرۋ ارنالارىنا تۇسەدى. وكىنىشكە وراي، ءقازىر 16 كوللەكتوردىڭ 4-ەۋى عانا جۇمىس ىستەپ تۇر. سول سەبەپتى، جاۋىن-شاشىن كەزىندە اباي داڭعىلىنان تومەن 56 كوشەنى سۋ باسادى. اسىرەسە، رايىمبەك داڭعىلىنىڭ بويىن، الماتى-2 ۆوكزال اۋماعىن» ، - دەدى ول.
سونداي-اق، قالانىڭ ارىق جەلىلەرى مەن كوللەكتورلارى ءبىرىڭعاي جۇيەگە قوسىلماعان. ال، ارىق جەلىلەرى مەن نوسەر كارىزدەرىن جاڭادان سالۋ جانە جاڭارتۋ قاجەت.
«جوبالىق-سمەتالىق قۇجات ءۇش بولىكتەن تۇرادى. ءبىرىنشى - باتىس بولىكتە، ياعني ناۋرىزباي، الاتاۋ، اۋەزوۆ اۋداندارىندا جىل باسىنان بەرى قۇرىلىس-مونتاجداۋ جۇمىستارى ءجۇرىپ جاتىر. ورتالىق بولىگى - بوستاندىق، المالى جانە جەتىسۋ اۋداندارىندا جۇمىستى ءالى باستاعان جوقپىز. سەبەبى، جسق-عا تۇزەتۋلەر ەنگىزىلۋى كەرەك. تۇزەتۋلەردەن سوڭ ارىقتار كوللەكتورلارمەن بايلانىستىرىلادى، وسىلايشا ارىق سۋلارى ارى قاراي ەسەنتاي وزەنىنە اعاتىن بولادى. سول ارقىلى كوشەنى سۋ باسۋ ماسەلەسى 80%-عا شەشىلەدى دەگەن جوسپار بار. ال قالعان 20%-ىن شەشۋ ءۇشىن قالانىڭ تومەنگى بولىگىندەگى ارىقتاردى قالپىنا كەلتىرىپ، اعىن سۋلاردى قولدانىستاعى كوللەكتورلارعا جىبەرەمىز. بارلىق ارىق جۇيەلەرى قولدانىستاعى كوللەكتورلارعا قوسىلادى. جسق بويىنشا ولار قالپىنا كەلتىرىلىپ، ءبىرىڭعاي وپەراتور «ەكو الماتى» مەملەكەتتىك كاسىپورنىنا بەرىلەدى» ، - دەدى سەرىك ادىلبايەۆ.
اتالىپ وتكەندەي، جسق-عا قاراجات بولىنگەن جاعدايدا، بۇل جۇمىستار جىل سوڭىندا باستالىپ، كەلەسى جىلى اياقتالۋى ءتيىس.
بۇعان دەيىن الماتىدا سۋ باسۋدىڭ الدىن الۋ جانە جويۋ ءۇشىن ارىق جەلىلەرى مەن وتكەلدەرىن تازارتۋ جۇمىستارى جۇرگىزىلگەنى جازىلعان.