الماتىدا كىسى ولىمىنە قاتىستى قىلمىس ءىزى سۋىماي اشىلدى

الماتى پوليسەيلەرى كىسى ولىمىنە قاتىستى قىلمىستىڭ بەتىن اشتى 

 “بۋران-292” پاترۋلدىك ەكيپاجى كىسى ءولتىرۋشىنى ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ونىڭ قۇرامىندا پوليسەي شىڭعىس نۇراحمەتوۆ جانە ءمادي بەلگىبايەۆ، شۋحرات ءبىلالوۆ،  ناۋرىزباي دانەكەيەۆ بولدى. تۇركسىب اۋداندىق پوليسيا باسقارماسىنا ادامنىڭ جوعالعانى تۋرالى ارىز كەلىپ ءتۇستى. تۋىستارىنىڭ ايتۋىنشا، ەر ادام دوسىنا بارىپ كەلەمىن دەپ كەتىپ، قايتىپ ورالماعان. سىرتقى قىزمەتتەردىڭ جەكە قۇرامى اراسىندا ىزدەۋدە جۇرگەن ادامنىڭ بەلگىلەرى بار باعدار دەرەۋ تاراتىلدى. بەلگىلەنگەن اۋماقتى جەتىك بىلەتىن پاترۋلدىك پوليسيا قىزمەتكەرلەرىنە ءبىرىنشى كەزەكتە تۇرمىسى ناشار ۇيلەردى تەكسەرۋ قيىنعا سوققان جوق. ۇيلەردىڭ ءبىرىنىڭ اۋلاسىندا توپىراق پەن جاپىراق باسقان شاعىن شۇڭقىردان زورلىقپەن ولتىرىلگەن جوعالعان ادامنىڭ دەنەسى تابىلدى.

«قىلمىس ورنىندا ينسپەكتورلار سول ۇيدە تۇراتىن كۇدىكتىنى ۇستادى. ول كىسى ءولتىرۋدى بىرگە ىشىمدىك ىشكەننەن كەيىن جاساعان. الدىمەن ەر ادامدار اراسىندا جانجال تۋىنداپ، ول توبەلەسكە ۇلاسقان»، – دەدى الماتى قالالىق پد جپقب پاترۋلدىك پوليسيا پولكىنىڭ كومانديرى، باۋىرجان حانتەمىروۆ.

سونىمەن قاتار الماتى قالالىق پد كادر ساياساتى باسقارماسى حابارلاعانداي، پوليسيا دەپارتامەنتى باستىعىنىڭ بۇيرىعىمەن اۋىر قىلمىستىڭ بەتىن ءىزىن سۋىتپاي اشقانى ءۇشىن پاترۋلدىك پوليسيا پولكىنىڭ ينسپەكتورلارى ماراپاتتالدى.