بۇدان بۇرىن ءقۇرىلىس كومپانياسىنىڭ زاڭسىز اعاش كەسكەنى تۋرالى حابارلاعانبىز.
كومپانيا باسشىسى رۇقسات قۇجاتتارىن العاننان كەيىن عانا كەسۋگە كىرىسكەنىن ايتتى، دەپ حابارلايدى Almaty-akshamy.kz
Qazaq Stroy قۇرىلىس كومپانياسىنىڭ ديرەكتورى بولات يبراگيم ۇلى الماتى قالاسى الاتاۋ اۋدانى، دارابوز ىقشام اۋدانىنداعى تۇرعىن ءۇي كەشەنى قۇرىلىسىنىڭ اۋماعىنداعى اعاشتاردى كەسۋ جونىندە مالىمدەمە جاسادى.
"ءبىز وسى قالادا تۋىپ وستىك جانە ءبىزدىڭ ىس-ارەكەتتەرىمىز قوعامدا جاعىمسىزدىق تۋدىرعانى وتە وكىنىشتى. وسى ماسەلە جونىندە ءتۇسىندىرىپ وتسەم دەيمىن. 2023-جىلدىڭ مامىر ايىندا وسى جەر ۋچاسكەسىن ساتىپ العاننان كەيىن تۇرعىندارمەن ۇنەمى كەزدەسىپ، كەلىسسوزدەر جۇرگىزىپ وتىردىق. تۇرعىندار بىرنەشە ماسەلەلەردى كوتەردى. ونىڭ ىشىندە، قوقىس تولى، جاياۋ جۇرگىنشىلەر جولى، جارىقتاندىرۋ جوق. سونىمەن قاتار، بۇل جەردە ءجۇرۋ ءقاۋىپتى بولدى. سەبەبى، مۇندا بەلگىلى ءبىر تۇرعىلىقتى جەرى جوق ادامدار جينالىپ، قاڭعىباس يتتەردىڭ ۇيىرلەرى كەزىپ ءجۇردى. اعاش كەسىلگەن جەردە ەشقاشان ساياباق بولعان ەمەس، تەك جابايى وسىندىلەر بولعان. سوندىقتان باستاپقىدا ءبىز ءوز جوبامىزدا زاماناۋي ساياباق سالۋدى قاراستىردىق"، دەدى بولات يبراگيم ۇلى.
قۇرىلىس سالۋشىنىڭ ايتۋىنشا، ساياباققا اعاشتار وتىرعىزىلادى، ولاردىڭ اراسىندا قىزىل كىتاپقا ەنگەن اعاش تۇرلەرى دە بولادى. سونىمەن بىرگە، كوگالدار توسەلىپ، سىرتقى جارىقتاندىرۋ، سۋارۋ جۇيەلەرى ورناتىلادى جانە جاياۋ جۇرگىنشىلەر جولدارى جاسالادى. دەمالىس جانە ۆوركاۋت الاڭدارى بار كوپفۋنكسيونالدى سپورت ايماعى جابدىقتالادى.
"جالپى ايتقاندا، مۇندا تۇرعىندارىمىز ءوز وتباسىمەن دەمالىپ، ۋاقىت وتكىزەتىن زاماناۋي ساياباق جاسالادى. جۇمىستى باستاماس بۇرىن مامانداندىرىلعان كومپانيا وسى ۋچاسكەدەگى اعاشتاردى ساناپ، تۇقىمدى زەرتتەدى. 2979 اعاش شىقتى. ونىڭ ىشىندە 182 اعاشتى قايتا وتىرعىزۋعا، ال 2797 اعاشتى كەسۋگە رۇقسات الدىق. مۇنىڭ ءبارىن ق ر زاڭناماسىنىڭ تالاپتارىنا سايكەس جاسادىق جانە بارلىق قاجەتتى قۇجاتتاردى الدىق. وتەماقى زاڭ بويىنشا كەسىلگەن 1-اعاشقا 10-اعاش وتىرعىزىلۋ قاجەت. سوندىقتان، بيىل بارلىعى 27 970 اعاش وتىرعىزامىز. ەڭ الدىمەن، ءبىز جاقىن ماڭداعى تۇرعىن ءۇي كەشەندەرىنىڭ اۋماعىندا، سودان كەيىن بۇكىل قالادا وتىرعىزۋدى باستايمىز"، - دەپ تولىقتىردى قۇرىلىس كومپانياسىنىڭ ديرەكتورى.
Qazaq Stroy اعاش تۇرلەرىن زەرتتەپ، ولاردى ساناپ، رۇقسات قۇجاتتارىن العاننان كەيىن عانا كەسۋگە كىرىسكەنىن اتاپ ءوتتى.
الاتاۋ اۋدانىنداعى دارابوز ىقشام اۋدانىندا تۇرعىن ءۇي كەشەنىنىڭ قۇرىلىسىنان جانە ساياباقتان بولەك: 1200 ورىندىق مەملەكەتتىك مەكتەپ، مەكتەپكە دەيىنگى مەكەمە، زەينەتكەرلەرگە ارنالعان دەمالىس ورتالىعى سالىنادى.