الماتىدا مۇقتاج جاندار قونىستانعان جاڭا تۇرعىن ءۇي كەشەنىنەن كەمشىلىكتەر انىقتالدى.
ءماجىلىس دەپۋتاتى ەرمۇرات باپي الماتىداعى «مادەنيەت» تۇرعىن ءۇي كەشەنىنىڭ تۇرعىندارىمەن كەزدەستى، دەپ حابارلايدى Almaty-akshamy.kz ءماجىلىستىڭ باسپا ءسوز قىزمەتىنە سىلتەمە جاساپ.
ءۇش مىڭعا جۋىق ادام قونىستانعان «مادەنيەت» تۇرعىن ءۇيىنىڭ باسىم بولىگىن الەۋمەتتىك تۇرعىدا مۇقتاج ادامدار قۇرايدى. كەزىندە الماتى اكىمدىگىنىڭ شەشىمىمەن مۇندا تۇتاس كورپۋستارعا تۋعاننان كەمتار بالا اسىراپ وتىرعان وتباسىلار، جالعىزباستى انالار مەن الەۋمەتتىك قامقورلىقتى قاجەت ەتەتىن ادامدار قونىستاندىرىلعان.
الەۋمەتتىك قامقورلىقتى قاجەت ەتەتىن ادامداردىڭ جاعدايىن ەسكەرگەن دەپۋتات ەرمۇرات باپي بىلتىر بۇل «مادەنيەت» ىقشاماۋدانىن ءوزىنىڭ دەپۋتاتتىق باقىلاۋىنا العان بولاتىن.
«مەملەكەتتىك باعدارلامامەن سالىنعان بۇل تۇرعىن ءۇي كەشەنىنىڭ قۇرىلىس جۇمىستارى بارىسىندا مەردىگەر كومپانيا «پرومكومپلەكت» ج ش س تاراپىنان ءبىرقاتار كەمشىلىككە جول بەرىلگەن. بۇل قۇرىلىس كىناراتى تۇرعىندارعا كوپ قولايسىزدىق تۋعىزىپ وتىر. ءتىپتى، قۇرىلىس تالاپتارى ساقتالماعانى بىلاي تۇرسىن، جاۋىن-شاشىن كەزىندە ۇيلەردىڭ توبەسىنەن سۋ اعاتىن»، – دەدى ەرمۇرات باپي.
وسىعان وراي دەپۋتات تۇرعىندارعا تۋعىزعان وسى كەلەڭسىزدىكتىڭ بارلىعىن ەسكەرىپ، قالاداعى الاتاۋ اۋداندىق اكىمشىلىگىنىڭ باسشىلىعىن، جاۋاپتى مەكەمەلەر مەن مەردىگەر كومپانيالاردىڭ وكىلدەرىن شاقىرتتى. كەمشىلىكتەردى جويۋ ماسەلەسىن تۇرعىنداردىڭ تىكەلەي قاتىسۋىمەن تالقىلاپ، بيىل وڭ شەشىمىن تابۋى ءتيىس ەكەنىن ايتتى. مۇددەلى مەكەمەلەر مەن جەرگىلىكتى مەملەكەتتىك ورگاننىڭ باسشىلىعى تالاپ ەتكەن تاپسىرمالار تولىق ورىندالاتىنىن ايتتى.