تالانتتى جاس قالامگەر ءارى سۋرەتشى يلياس يۋسۋفجانوۆتىڭ «كەرەي مەن جانىبەك» اتتى كوميكسى جارىق كوردى. قازاق جانە ورىس تىلىندە شىققان كوميكستىڭ تانىستىرىلىمى بۇگىن الماتىدا ءوتتى دەپ حابارلايدى Almaty-aqshamy.kz.
كوميكس جانرى ەلىمىزدە كەنجەلەپ قالعان جانر ەكەنى ءمالىم. سوندىقتان دا يلياس يۋسۋفجانوۆ سەكىلدى جاس تالانتتاردىڭ اتالعان جانردا ەڭبەكتەنىپ، قازاق مەملەكەتتىلىگىنە قاتىستى تاريحي دەرەكتەردى جاستارعا مەيلىنشە ءوتىمدى تاسىلمەن جەتكىزۋى ايرىقشا مانگە يە. كوميكستىڭ تانىستىرىلىمىنا جينالعان قاۋىم پىكىرى دە وسىعان توپتاستى.
اۋەزوۆ اۋدانىندا وتكەن ادەبي شاراعا الماتى قالالىق اكىمدىگى مەن اۋەزوۆ اۋدانى اكىمدىگىنىڭ رەسمي وكىلدەرى، قالامگەر جازۋشىلار مەن زيالى قاۋىم وكىلدەرى قاتىستى. سونداي-اق، اۆتوردى قولداۋعا ونىڭ قاتارلاس جاستارى، احمەت جۇبانوۆ اتىنداعى مۋزىكالىق مەكتەبىنىڭ Giovani Talenti كامەرالىق وركەسترى، وزگە دە ونەرپازدار قاتىستى.
الماتى قالاسى اكىمىنىڭ ورىنباسارى ارمان قىرىقبايەۆ پەن اۋەزوۆ اۋدانى اكىمى ابزال ەگەمبەرديۆ جاس اۆتورعا ارنايى قۇتتىقتاۋ حاتىن جولدادى، ءوز قولداۋلارىن جەتكىزدى. رەسمي قۇتتىقتاۋلاردا مادەني، تاريحي قۇندىلىقتاردى جاستارعا ءوتىمدى تاسىلمەن ناسيحاتتاۋدىڭ ماڭىزدىلىعىنا ايرىقشا توقتالعان. بۇل جاعىندا ناتيجەلى ەڭبەك ەتكەن اۆتورعا شىعارماشىلىق تابىس تىلەگەن.
قازاقستان جازۋشىلار وداعى ءتوراعاسىنىڭ ءبىرىنشى ورىنباسارى نۇرجان قۋانتاي ۇلى دا قالامگەرلەر ورداسىنىڭ سالەمىن جەتكىزىپ، يلياستى ءوز قاتارلارىنا قابىلداعانىن سۇيىنشىلەدى. وسىلايشا يلياس يۋسۋفجانوۆ قازاقستان جازۋشىلار وداعىنىڭ ەڭ جاس مۇشەسى اتاندى. بۇعان قوسا، كوميكس اۆتورى «بەيبىتشىلىك الەمى» حالىقارالىق بىرلەستىگى جاعىنان «قازاقستان بولاشاعى» توسبەلگىسىمەن ماراپاتتالدى.
اۋەزوۆ اۋدانى مادەنيەت جانە تىلدەردى دامىتۋ ءبولىمىنىڭ باسشىسى بانۋ ماناپوۆا جۋرناليستەرگە: «جاستار اراسىندا ۇلتتىق قۇندىلىقتاردى، تاريحىمىزدى ناسيحاتتاۋدا «كەرەي مەن جانىبەك» كوميكسى سەكىلدى ەڭبەكتەردىڭ تيگىزەر كومەگى مول. سەبەبى، ول جاستاردىڭ قابىلداۋىنا جەڭىل جانە ىڭعايلى. سول ءۇشىن ءبىز اۆتوردى وسى ەڭبەگىمەن قۇتتىقتايمىز، ءارى شىعارماشىلىعىنا قولداۋ كورسەتە بەرمەكپىز»، – دەگەن پىكىرىمەن ءبولىستى.
اۆتور جايلى بىرەر ءسوز:
يلياس يۋسۋفجانوۆ – ادەبي ورتاعا يلياس يۋسۋف دەگەن قالاماتىمەن تانىلىپ كەلە جاتقان جاز جازۋشى. بۇعان دەيىن دە بىرنەشە ەڭبەكتەرى جارىق كورىپ ۇلگىرگەن بولاتىن. ول «قازاقستاندىق ەڭ جاس قالامگەر» رەتىندە جەرگىلىكتى گيننەس رەكوردتار كىتابىنا دا ەنگەن.