الماتىدا حالىقتى كەنە ەنسەفاليتىنەن قورعاۋعا باعىتتالعان كەنەگە قارسى اۋقىمدى ءىس-شارالاردى جۇرگىزۋ جالعاسۋدا.
بۇل تۋرالى قالالىق دەزينفەكسيا ورتالىعىنىڭ ديرەكتورى اينۋرا اككوشكاروۆا وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz.
«الماتىنىڭ ورمان جانە قالا ساياباقتارىنداعى كەنە ەنسەفاليتىنىڭ تابيعي وشاقتارىندا جىل سايىنعى جويۋ ءىس-شارالارىن وتكىزۋ - نەگىزگى ەپيدەميولوگيالىق ءىس-شارالاردىڭ ءبىرى»، - دەپ اتاپ ءوتتى سپيكەر.
ول الماتى قالاسى بويىنشا سانيتارلىق-ەپيدەميولوگيالىق باقىلاۋ دەپارتامەنتىنىڭ 2025 جىلعى 18 ناۋرىزداعى №59ء-و بۇيرىعىنا سايكەس العاشقى وڭدەۋ 26 ناۋرىزعا جوسپارلانعانىن اتاپ ءوتتى. الايدا جاڭبىر مەن ىلعالدىلىقتىڭ جوعارىلاۋىنا بايلانىستى جۇمىستار كەيىنگە قالدىرىلىپ، 31 ناۋرىزدا باستالعان بولاتىن.
اينۋرا اككوشكاروۆا حابارلاعانداي، بيىلعى جىلى ەكى وڭدەۋ تۋرى جوسپارلانعان. دەزينسەكسيالىق وڭدەۋگە جاتاتىن جالپى اۋدانى 4 733،12 گەكتاردى قۇرايدى. بۇل ءىس-شارالارعا 144 152 000 تەڭگە ءبولىندى، ال ءبىر تۋرعا 72 ميلليون تەڭگە جۇمسالادى.
ول بيىل جاڭا «سيپەرترين» پرەپاراتى قولدانىلاتىنىن دا اتاپ ايتتى. پرەپارات گەكتارىنا 0،75 ليتر تۇتىنۋ نورماسىمەن 3 579،6 ليتر كولەمىندە ساتىپ الىندى. كەنەلەردىڭ تاۋەلدىلىگىن بولدىرماۋ ءۇشىن قۇرالدار جىل سايىن جاڭارتىلىپ وتىرادى: 2023 جىلى «فاۆوريت ۆ.ك. ە.»، 2024 جىلى «دەلتەكس» قولدانىلدى.
سپيكەر 14 ساۋىردەگى جاعداي بويىنشا الاتاۋ (2،93 گا)، المالى (46،7 گا)، اۋەزوۆ (17،97 گا)، جەتىسۋ (50،05 گا)، ناۋرىزباي (9،71 گا)، بوستاندىق (156 گا) اۋداندارىندا وڭدەۋ اياقتالعانىن حابارلادى.
جۇمىس تۇركسىب (19،9 گا)، مەدەۋ (31،99 گا) اۋداندارىندا، سونداي-اق مەدەۋ (115،5 گا) جانە بوستاندىق (140،3 گا) اۋداندارىنىڭ ورمان القاپتارىندا جالعاسۋدا. ءقازىردىڭ وزىندە وڭدەلگەن جالپى الاڭ - 591،064 گا.
«جۇمىستار ارنايى دايىندىقتان وتكەن دەزينسترۋكتورلار مەن دەزينفەكتورلار تاراپىنان جۇرگىزىلۋدە. بارلىق ماماندار تۇراقتى تۇردە نۇسقاۋلىقتان ءوتىپ، قاجەتتى جابدىقتارمەن تولىق قامتاماسىز ەتىلگەن»، – دەپ اتاپ ءوتتى ورتالىق ديرەكتورى.
ونىڭ ايتۋىنشا، بۇگىندە ورتالىقتىڭ قاراماعىندا ىستىق جانە سۋىق تۇمان تەرموگەنەراتورلارىمەن، گيدروپۋلتتەرمەن، «فازەندا» بۇرىككىشتەرىمەن، سونداي-اق اۆتوكولىكتەرمەن جابدىقتالعان ەكى ءموبيلدى بريگادا بار. 2025 جىلى ءۇش جاڭا جابدىق، ال 5 مىڭنان استام جەكە قورعانىس قۇرالدارى ساتىپ الىندى.