الماتىدا اۋماقتاردى كەنەلەرگە قارسى وڭدەۋدىڭ ءبىرىنشى كەزەڭى باستالدى – ونىڭ اياسىندا 2300 گەكتاردان استام ساياباق، سكۆەر جانە ورمان القاپتارى قامتىلادى.
اتالعان جۇمىستار سانيتاريالىق-ەپيدەميولوگيالىق باقىلاۋ دەپارتامەنتىنىڭ 2025 جىلعى 18 ناۋرىزداعى №59ء-و بۇيرىعىنا سايكەس جۇرگىزىلۋدە، دەپ حابارلايدى aqshamnews.kz.
بۇل تۋرالى الماتى قالالىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا حابارلادى.
«وڭدەۋگە جاتاتىن وبەكتىلەر – جالپى اۋدانى 1764،9 گەكتار بولاتىن 8 ورمان ءماسسيۆى جانە 601،6 گەكتار اۋداندى قامتيتىن 101 قالالىق ساياباق پەن الاڭ. دەزينفەكسيا ورتالىعىنىڭ ماماندارى ءبىزدىڭ باقىلاۋىمىزدا وڭدەۋ جۇمىستارىن جۇرگىزۋدە، ءبىز ءار كەزەڭدە تيىمدىلىكتى قاداعالاپ وتىرامىز»، — دەدى سپيكەر.
ونىڭ ايتۋىنشا، كەنەلەرگە قارسى باقىلاۋ ەنتومولوگيالىق ادىستەرمەن دە جۇرگىزىلەدى. ەپيدەميا ماۋسىمىنىڭ باسىندا ماماندار ادامداردان جينالعان 34 كەنە ۇلگىسىن زەرتتەدى. ءبىر ۇلگىدە كەنەلى ەنسەفاليت انتيگەنى تابىلدى. شاعۋ وقيعاسى الماتى وبلىسىندا بولعانى انىقتالدى.
«الدىن الۋ شارالارى رەتىندە ءبىز الماتىلىقتاردى جابىق كيىم كيىپ، رەپەللەنتتەردى قولدانۋعا، تابيعاتتا سەرۋەندەنگەننەن كەيىن وزدەرىن جانە جەكە زاتتارىن مۇقيات تەكسەرۋگە كەڭەس بەرەمىز. كەنە شاققاننان كەيىن ءتورت كۇننەن كەشىكتىرمەي مەديسينالىق كومەككە جۇگىنۋ ماڭىزدى»، — دەپ اتاپ ءوتتى قالىقوۆا.
سونداي-اق، ول قالادا قوسىمشا ۆاكسيناسيا بار ەكەنىن ايتتى. دەنساۋلىق ساقتاۋ باسقارماسىنىڭ قويماسىندا بەلگيالىق TicoVac ۆاكسيناسىنىڭ 11 447 دوزاسى بار. باستاپقى كۋرس ءۇش دوزادان تۇرادى، ءبىراق قىستا ەگۋگە ۇلگەرمەگەندەر ءۇشىن شۇعىل سحەما قاراستىرىلعان.